УИХ-ын өнөөдрийн чуулганаар “Коронавируст халдварын цар тахлын үед санхүү, эдийн засгийн тогтвортой байдлыг хангах, эрсдэлээс урьдчилан сэргийлэх, төрийн үйлчилгээнд цахим шилжилт хийх УИХ-ын тогтоолын төслийг хэлэлцэх эсэхийг хэлэлцэж байна. Тогтоолын төслийг хэлэлцэхийг дэмжиж эсэхэд гишүүд байр сууриа илэрхийлснийг тоймлон хүргэе.

Ж.Батзандан: Хэдэн санал хэлмээр байна.

УИХ-ын дарга Г.Занданшатар: Хуулийн төсөл дараа шүү. Эхлээд тогтоолын төсөл хэлэлцэх эсэхээ шийдэх гэж байна.

Ж.Батзандан: Өө тийм үү. Монголбанктай холбоотой асуудалд...

УИХ-ын дарга Г.Занданшатар: Монголбанк дараа нь шүү.

Ж.Батзандан: Иргэдийн тэтгэвэр барьцаалсан зээлийг төрөөс нэг удаа тэглэх хуулийн төсөл баталсан. Нийт хэчнээн төгрөгийг барьцаалсан байгаа юм бэ. Банкинд барьцаалсан үнэт цаас гэж байна. Ямар үнэт цаас байгаа юм э. Төрийнх юм уу, хувийн хэвшлийнх юм уу?. 30 жил банкны эздийг дэмжиж ирлээ. Тогтоолын төсөлд банкнаас бусад салбарыг хөгжүүлнэ гэсэн байна.  Жил бүр УИХ-аас өгдөг чиглэл биз дээ. Хөрөнгийн бирж хэлж байна уу гэж бодож байн. Түүнээс биш ББСБ, ломбард хэлээгүй биз дээ. Үүнээс гадна ипотикийн зээлийн хүү царцаах, зээлийн үндсэн төлбөрийн эргэн төлөлтийг хойшлуулах асуудлыг тодорхой тусгаж өгөх хэрэгтэй байна.

Хууль санаачлагч Б.Баттөмөр гишүүн: Тэтгэвэр иргэдийн тэтгэвэр барьцаалдсан зээлийг НДС хөрөнгийг чөлөөлөх тухай тогтоолд тусгасан. Нийт 700 орчим тэрбум төгрөг шаардлагатай. Үүнийг Монголбанк бонд гаргаад банкуудаас худалдаж авъя гэж ярилцсан. Ингэснээр банкуудад байгаа мөнгөний эргэлтийг нэмэгдүүлнэ. Иргэний тэтгэвэр барьцаалсан зээл шүү. Түүнээс биш ББСБ, ломбардын өр тэглэх асуудал байхгүй.

Ж.Батзандан: Банкуудыг мөнгөжүүлэх гэсэн бодлого юм биш үү. Иргэний тэтгэвэр барьцаалсан зээлийг чөлөөлөхдөө “Хаан” банк Төрийн банкийг хангалттай дэмжлээ. Хэн гэдэг дарга НДС-ийн мөнгийг банкинд аваачиж өгсөн юм бэ. Аль аль банкуудад байгаа юм бэ. Коронагаар далимдуулж банкуудыг мөнгөжүүлэхээ болиоч ээ. Монголчууд биш банкны эзэд л баяжиж гүйцлээ.

УИХ-ын дарга Г.Занданшатар: Банкуудыг дэмжсэн зүйл байхгүй.