Монгол хүн та хоногийн 24 цагийн ихэнхийг юунд зарцуулдаг вэ? Үндэсний Статистикийн хорооноос дөрвөн жил тутамд “Цаг ашиглалтын судалгаа”-г зохион байгуулдаг бөгөөд 2019 оны судалгааны үр дүн гарчээ.

Цаг ашиглалтын судалгаагаар монгол хүн өдөрт дунджаар зургаан минут спортоор хичээллэж, 38 минут сурч, 45 минут хүүхэд асарч, 121 минут олон нийтийн мэдээллийн хэрэгсэл ашиглаж, 155 минут гэрийн ажил хийж, 552 минут буюу 9.2 цаг унтдаг гэсэн үр дүн гарсан байна.

Мөн өглөө 5 хүн тутмын 1 нь 7-8, 2 нь 8-9, 1 нь 9-10 цагийн хооронд сэрдэг бол орой 21-22 цагийн хооронд 5 хүн тутмын 1 нь, 22-23 цагийн хооронд 5 хүн тутмын 3 нь 23-24 цагийн хооронд 10 хүн тутмын 9 нь унтаж байдаг аж.

Харин 12 ба түүнээс дээш настай хүний нэг өдрийн амьдралын хэв маягийн ихэнхийг унтаж, хоол идэхээс гадна олон нийтийн мэдээллийн хэрэгсэл ашиглах, чөлөөт цаг, урлаг спортын үйл ажиллагаа, олон нийтийн арга хэмжээнд оролцох, сурах, цалин хөлсгүй сайн дурын ажилд хийхэд зориулдаг байна. Цаг ашиглалтыг байршлаар нь авч үзвэл өрхийн хэрэглээнд зориулсан бүтээгдэхүүн үйлдвэрлэл нийслэлд хамгийн бага. Аймаг, сумын төв, хөдөөд хамгийн их хувийг эзэлж байв. Эсрэгээрээ хөдөлмөр эрхлэлт хүн амын төвлөрлөөс шалтгаалж нийслэлд хамгийн их байгаа нь судалгаанаас харагдана.

Сонирхуулахад, хүн амын дийлэнх хэсэг нь өдрийн хоолыг 12-14 цаг, оройн хоолыг 18-21 цагийн хооронд иддэг байна. Олон нийтийн мэдээллийн хэрэгслийг 20-22 цагийн хооронд буюу хоолоо идсэний дараа хамгийн идэвхтэй хэрэглэж байгаа аж.