Монголын сагсан бөмбөгийн хөгжил, өсөлтөд үнэтэй хувь нэмэр оруулсан тамирчин, дасгалжуулагч, спортын зүтгэлтэн ОУХМ Магнайдоржийн Отгонбаяр Монгол Улсын Ерөнхийлөгчийн зарлигаар “Монгол Улсын гавьяат тамирчин” цолоор шагнагдах боллоо. Отгонбаяр нь сагсан бөмбөгийн спортод тасралтгүй 20 гаруй жил зүтгэх хугацаандаа:

• МСБХ-ны анхдугаар лигийн аварга

• Нийт 6 удаагийн лигийн аварга

• Лигийн “Тэргүүн тоглогч”

• Улсын шигшээ багийн бүрэлдэхүүнд олон жилийн турш амжилттай тоглож байсан

• Одоогоор МСБХ-ны шигшээ багийн захирал албыг гүйцэтгэж буй зэрэг онцгой амжилтуудаар Монголын сагсан бөмбөгийн түүхэнд нэрээ тод тамгалсан шилдэг тамирчин юм.

Ийнхүү Монголын сагсан бөмбөгчдөөс төрөн гарч буй 9 дэх “Гавьяат тамирчин” төрөх гэж буй нь Монголын сагсан бөмбөгийн спортын амжилт, тамирчдын хөдөлмөрийг үнэлсэн томоохон үйл явдал юм. Энэ баярт мэдээг бүх үеийн сагсан бөмбөгчид, дасгалжуулагчид, дэмжигчид, спорт сонирхогчдод баяртайгаар хүргэж байна. Сагсан бөмбөгчдийн яруу алдрыг үеийн үед!