“Бээжин 2022” XXIV дэх удаагийн өвлийн олимп БНХАУ-ын нийслэл Бээжин хотод 16 өдрийн турш үргэлжилж өнөөдөр хаалтаа хийх гэж байна. Хаалтын үйл ажиллагааны үеэр дараагийн олимпыг зохион байгуулах Итали улсын төлөөлөлд олимпын холбооны туг далбаа болон олимпын бамбар гэх зэрэг зүйлсийг хүлээлгэн өгнө.
XXV дахь удаагийн өвлийн олимп нь 2026 оны хоёрдугаар сарын 6-22-ны өдрүүдэд Итали улсын Милан болон Кортина д’Ампеццо гэх хоёр хотод зохиогдох бөгөөд олимпын нээлтийн болон хаалтын үйл ажиллагаанууд нь хоёр өөр хотод явагдана. Энэхүү олимп нь Итали улсын зохион байгуулах дөрөв дэх олимп ба Милан хотод зохиогдох анхны олимп юм. Мөн хоёр өөр хотод албан ёсоор зохиогдох анхны олимпын наадам гэдгээрээ онцлог юм.
Энэ удаагийн өвлийн олимпыг зохион байгуулахаар Милан-Кортина д’Ампеццо хотуудын эсрэг Шведийн Стокхолм-Аре хотууд өрсөлдсөн хэдий ч 2019 оны зургадугаар сарын 24-нд Швейцар улсад хуралдсан Олон Улсын Олимпын Хорооны 134 дэх хуралдааны үеэр 47-34 гэх саналаар Итали улс ялалт байгуулсан. Итали улс нь 2006 оны Турины олимпыг зохион байгуулж байсан бөгөөд ийнхүү 20 жилийн дараа дахин өвлийн олимпыг нутаг дээрээ хүлээн авахаар болсон.
NHL-д тоглодог хоккейн тамирчид энэ удаагийн Бээжингийн олимпод оролцолгүй өнжсөн бөгөөд 2026 оны олимпыг ч мөн адил өнжих нь тодорхой болоод байгаа юм байна. Мөн 2026 оны олимпын наадмын хөтөлбөрт нэгэн шинэ спортын төрөл багтаж байгаа нь уулын цана юм. Энэхүү спортыг олимпын хөтөлбөрт 2020 оны долдугаар сарын 20-нд Олон Улсын Олимпын Хорооны хурлын үеэр баталсан бөгөөд уулын цанын төрлөөр таван багц медалийн эзэд тодрох юм.
П.Тамир
