Өнгөрсөн пүрэв гарагт хэвлэлд өгсөн ярилцлагынхаа үеэр АНУ-ын ерөнхийлөгч Жо Байден Орос-Украины нөхцөл байдлын тухай сурвалжлагчдын асуултад хариуллаа. Түүнээс нэгэн сурвалжлагч дэлхийн хамгийн том эдийн засагтай 20 улсын удирдагчид цуглан дэлхийн эдийн засаг болон улс төрийн чиг хандлагыг өөрчлөх хэмжээний яриа хэлэлцээ өрнүүлдэг “Жи-20”-оос ОХУ-ыг хасах талаар асуух үед Жо Байден, “Миний хувьд ОХУ-ыг Жи 20-д байх эрхгүй гэж бодож байна.

Гэхдээ энэ нь зөвхөн миний хувь хүний бодол шүү. Энэ шийдвэрийг "Жи 20"-ын гишүүн орнууд нийлж гаргах ёстой. Манай улс энэхүү асуудал дээр энэ жилийн арван нэгдүгээр сард "Жи 20" уулзалтыг зохион байгуулах Индонез улс болон бусад орнуудын шийдвэрийг харж байж шийдвэр гаргана. Мөн миний зүгээс Украин улсыг ажиглагч орны хувиар "Жи 20" уулзалтад оролцуулах хүсэлтэй байгаа. Харин Украин улс дайны галыг зогсоохын тулд ОХУ-д газар нутгаасаа өгөх эсэх нь тэдний өөрсдийн гаргах шийдвэр. Би уг асуудалд гаднаас оролцохгүй” гэж хэлжээ.

Мөн уг асуудалтай холбоотойгоор Индонез улсын нийслэл Жакарта хотод суугаа ОХУ-ын элчин сайд Владимир Путинг энэ оны "Жи 20" уулзалтад оролцох хүсэлтэй байгаа гэдгийг нь мэдэгдсэн.

Эх сурвалж: CNN