Эдгээр өдрүүдэд та дэлгэцний өмнө суугаад аймшгийн кино үзээд, араас нь хүүхэлдэйн киногоор айдсаа дарж сууна уу. Тийм бол өөр кино үзвэл дээр биш үү. Манай сайтын зүгээс уншигч та бүхэндээ зориулж өдөрт нэг кино үзэхийг санал болгож байна.
Энэ удаад бид найруулагч Риан Жонсоны зохиолыг нь бичиж, найруулсан “Glass Onion: A Knives Out Mystery” киног онцолж байна.
2019 онд бүтээгдсэн "Knives Out" киноны бие даасан үргэлжлэл уг кинонд бидний сайн мэдэх James Bond буюу Даниэл Крэйг шинэ хэрэг үүсгэж буй ахлах мөрдөгч Бенуа Бланкийн дүрийг дахин бүтээж байна. Гэмт хэрэг төрлийн уг кинонд Эдвард Нортон, Жанел Мона, Кэтрин Хан, Лесли Одом Жр, Жессика Хенвик, Маделин Клайн, Кейт Хадсон, Дэйв Баутиста нараас бүрдсэн шинэ жүжигчид тоглож буй.
Дашрамд дурдахад уг киноны найруулагч Риан Жонсон “Breaking bad” цувралын гурван ангийг найруулж байсан туршлагатай.
2019 онд "Knives Out" киноны дараахан найруулагч Жонсон уг киноны үргэлжлэл бүтээгдэнэ хэмээж байсан юм. 2020 онд тэрээр Крэйгтэй хамт дүрээ дахин бүтээхээр зохиол дээр ажиллаж байгаа нь батлагдсан. 2021 оны гуравдугаар сард Netflix “Knives Out” киноны хоёр цувралын эрхийг 469 сая доллараар худалдаж авсан. Зураг авалт 2021 оны зургадугаар сараас долдугаар сарын хооронд Грекийн Спецс арал дээр хийгдсэн бөгөөд есдүгээр сар хүртэл Грекээс өөр газруудад үргэлжилсэн байна.
Энэхүү кино нь 2022 оны есдүгээр сарын 10-нд Торонтогийн олон улсын кино наадамд дэлхийн анхны нээлтээ хийсэн бөгөөд арванхоёрдугаар сарын 23-нд албан ёсны нээлтээ хийж, “Netflix”-ээр цацагдахаас өмнө 2022 оны арваннэгдүгээр сарын 23-нд нэг долоо хоногийн хугацаанд театруудаар цацагдаж магадгүй байгаа аж. Хэдийгээр кино маань цацагдаагүй байгаа ч та бүхэн уг киноны өмнөх ангийг нь үзэж болох юм. Дараа нь төд удахгүй цацагдах шинэ киногоо үзвэл илүү амттай байх болов уу хэмээх үүднээс энэхүү нийтлэлийг бэлтгэлээ.
Л.Сайнаа
