Цаг Уур, Орчны Шинжилгээний Газрын дарга С.Энхтүвшин өнөөдөр агаарын бохирдлын нөхцөл байдлын талаар мэдээлэл өглөө.

Тэрбээр "Агаарын бохирдол ихсэх үе нь жил бүр харилцан адилгүй байдаг. 2021 онд арваннэгдүгээр сарын 13-ны үеэр агаарын бохирдол ихэссэн байв. Энэ жил арванхоёрдугаар сарын 7-ноос агаарын бохирдол эрс нэмэгдлээ.

Ялангуяа арванхоёрдугаар сарын 25-наас хойш манай нийт нутгийг хамарсан Хойд туйлын хүйтэн агаар орж ирсэн. Үүнээс хойш хүйтэн агаар тогтвортой хэвээр байна. Салхи байхгүй, газарт шөнөдөө -30, өдөртөө -10 гаруй градустай байна. 

Инверс гэж ойлголт бий. Энэ нь газрын гадарга орчимд хамгийн хүйтэн агаар хургаад, дээшлэх тусам температур нэмэгддэг, босоо, хэвтээ чиглэлд ямар ч салхигүй, битүү орчин үүсгэдэг гэсэн үг.

Ийм орчинд айлуудын болон станцуудын яндангаас гарч байгаа утаа тухайн орчиндоо бөөгнөрч, тунардаг. Өглөөний цагаар айлууд гэрээ дулаацуулж, цай, хоолоо бэлтгэх үеэр утааны оргил үе таардаг. Энэ жил өмнөх оноос харьцангуй хүйтэн байгаа тул инверс зузаан тогтож байгаа" гэв.