Казино, мөрийтэй тоглоомын ертөнц бол дэлхийн баячуудын хөрөнгөө үгүй хийх, эсрэгээрээ өсгөн үржүүлэх хамгийн том талбаруудын нэг болжээ. Тэнд цөөн хэд нь хожиж, ихэнх нь алдаж байдаг гэцгээдэг. Тэгвэл бид та бүхэнд дэлхийн казиногийн түүхэн дэх хамгийн том зургаан хожлыг танилцуулж байна. 

Арчи Карас - 50 долларыг 40 сая доллар болгосон

Грекээс АНУ-д цагаачилсан Арчи Карас бол гэнэт баяжаад, агшин зуурт хувхайрсан цөөхөн түүхийн гэрч юм. Тэрбээр маш авьяаслаг покер тоглогч гэдгээрээ алдартай байжээ. Карас Лас Вегас хотын казиногийн байнгын үйлчлүүлэгч байсан бөгөөд амжилтад хүрч чадсан. Тэрбээр 50 доллартой эхлээд 40 сая доллар болгосон нь казиногийн бүх цаг үеийн хамгийн өндөр дүнтэй хожилоор нэрлэгддэг байна. Гэвч тэр удалгүй бүх мөнгөө алдсан гэдэг. 

Онлайн казиногийн хамгийн том ялагч – 38 сая доллар

Сүүлийн жилүүдэд онлайн казиногоос хүмүүс их хэмжээний мөнгө хожих боломж нэмэгдэж байгаа гэнэ. Питер гэх 20 настай Норвеги залуу дэвшилтэт жекпоттой "Арабын баатрууд" гэгддэг онлайн слот тоглоом тоглож, 11.7 Норвегийн крон буюу ойролцоогоор 38 сая долларын жекпот хожжээ. Энэ нь казиногийн түүхэнд хоёрт, онлайн казиногийн түүхэнд нэгдүгээрт бичигдэх том хожил юм. 

Керри Пакер MGM GRAND, LAS VEGAS-д: 20-40 САЯ 

Нэгэн орой Австралийн алдарт тэрбумтан зугаацахын тулд блэк, баккара тоглохоор шийджээ. Эх сурвалжийн мэдээллээс харахад тэр 20-40 сая доллар хожсон. Ойролцоогоор 30 сая доллар гэж ярьдаг. Үнэндээ тэр орой Пакер их олон ялалт байгуулсан тул яг тодорхой тоо байдаггүй гэнэ. Тэрбээр хожлынхоо дараа тэндхийн ажилчдад өгөөмөр хандаж, мөнгө тараасан гэдэг. Түүнчлэн тэр мөрийтэй тоглоомд донтож, цаашлаад их хэмжээний мөнгө алдаж байжээ. 

Залуу инженер – 39.7 сая доллар

Том ялагч болгон нэрээ нийтэд зарлаад байдаггүй. Дөнгөж 25 настай "залуу инженер" гэдгээр нь олон нийт мэддэг, нэгэн тоглогч Лас Вегас дахь Экскалибур цэнгээний газарт автомат тоглоом тоглодог байжээ. Энд тэрбээр 39.7 сая гаруй долларын Jackpot хожсон. Мөн тэр ялалтаа хуваах гэрээ байгуулсан буюу хожсон мөнгөнөөсөө тул жил бүр 1.5 сая доллараар нь цувуулан авдаг гэнэ. 

Элмер Шервин - 26 сая доллар

Элмер Шервин бол хамгийн азтай хүмүүсийн нэг юм. Элмер эхнэрийнхээ хамт АНУ-аар аялж байхдаа Лас Вегаст саатжээ. The Mirage казинод тэрбээр азаа туршиж үзээд 4.6 сая долларын жекпот хожжээ. Арван зургаан жилийн дараа түүнд дахин аз тохиож, Лас Вегас дахь Cannery Casino & Hotel-д Megabucks тоглоомын машинаас 21 сая доллар хожсон гэдэг. Ямартай ч түүний түүх мөнгөө алдсан гэх муу мэдээгээр төгсдөггүй. 

Жон Типпин - 12 сая доллар

Бүх ялагчид урт удаан, аз жаргалтай амьдардаггүй. Шуудангийн ажилтан, 50 настай Жон Типпин 1996 онд Лас Вегас дахь Gold Coast казинод зочлох үеэрээ том ялалт байгуулжээ. Тэрбээр Megabucks тоглоомын машинаас 12 сая доллар хожсон байна. Харамсалтай тэр үрэлгэн амьдралын хэв маягаасаа болж бүх мөнгөө дуусгасан гэдэг. Тэрбээр мөнгө хожсоныхоо дараа "I Did It:My Life after Megabucks" хэмээх номоо бичжээ. 

Л.Сайнаа