ЦЕГ-ын Хар тамхитай тэмцэх газраас өнөөдөр хар тамхитай холбоотой гэмт хэргийн талаар УСХА хэлтсийн дарга Цагдаагийн хурандаа Б.Батхуяг дараах мэдээллийг өглөө. 

“Монгол Улсын иргэн гадаадын иргэнтэй хамтарч мансууруулах үйлчилгээтэй бодисыг Монгол Улсын хилээр хууль бусаар нэвтрүүлж, бусад худалдан борлуулж байна гэдэг мэдээллийн дагуу шалгалтын ажиллагаа явуулж, гэмт этгээдийг баривчилж, шалгалтын ажиллагаа явуулахад 510 грамм мансууруулах үйлчилгээтэй бодисыг хурааж авсан. Уг бодис нь сэтгэц нөлөөлөх үйлчилгээтэй бодис байсан. Уг этгээдэд нь хар тамхитай тэмцэх газарт гадуур шалгагдаж байхдаа дахин гэмт хэрэг үйлдсэн.

Мөн Монгол Улсын дөрвөн иргэн ОХУ-аас Сэлэнгэ аймгийн Алтанбулагийн хилийн боомтоор их хэмжээ мансууруулах үйлчилгээтэй эмийг нэвтрүүлж, нийслэлд оруулж ирсэн. Тэдгээр этгээдийг баривчилсан. Улмаар таслан сэргийлэх арга хэмжээ авсан. Тухайн эмийг хүүхэд залуучууд мансууруулах зорилгоор хэрэглэдэг. Хоногт нэгээр хэрэглэдэг эмийг олон ширхэгээр тарианы ус найруулж судсаар тарьж мансуурч байна.

Каннабисын төрлийн ургамал бол дэлхий дээр 100 гаруй төрлийн сорт байдаг. Манайд бол хоёр төрлийн сорт ургадаг. Эмчилгээний зорилгоор судлагдаж байгаа ч албан ёсоор зөвшөөрөгдөөгүй. 9 салаат гэдэг нэртэй эмчилгээнд хэрэглэдэг ургамал байхгүй. Каннабисын төрлийн бодисыг хэрэглэсэн үедээ хүн амины хэрэг үйлдсэн асуудал 2021 онд бүртгэгдсэн. 

Нэг зүү тариур, дуслын системийг 5-10 хүүхэд дамжуулж хэрэглэж байгаа асуудал байна. Тиймээс халдварт өвчин авах тохиолдол нэмэгдэж байна. Бага насны буюу 13 настай хүүхэд мансууруулах бодис хэрэглэсэн тохиолдол бүртгэгдсэн. Эцэг эхчүүд хүүхдийнхээ гар хурууг сайн шалгаж, зүү тариурын ул мөр байгаа эсэхийг харж байх хэрэгтэй. Одоогийн байдлаар 69 хүүхэд зөрчлийн болон эрүүгийн хуулиар хариуцлага хүлээсэн. Гадуурхаж, шахаж, шаардаж нэгэндээ хэрэглүүлэх тохиолдол ч байна. 

Монгол Улсын нутаг дэвсгэрт буюу 5000 га газарт ургадаг каннабисын төрлийн ургамлыг түүж бэлтгэж, худалдан борлуулахтай холбоотой гэмт хэрэг 70 хувийг эзэлж байна. Үлдсэн 30 хувийг улсын хилээр хууль бусаар нэвтрүүлсэн бодистой холбоотой гэмт хэрэг эзэлж байна. Иймд иргэд бусдын дайвар ачааг авахгүй байх хэрэгтэй.

Гадны улсад бол мансууруулах бодисын хэрэгт холбогдсон "олны танил" хүмүүс дахиж нийтийн өмнө гардаггүй. Гэтэл манай улсад нэвтрүүлэгт ороод Хар тамхитай тэмцэх газрын алба хаагчид болон байгууллагын нэр хүндэд халдаж, гутаан доромжлоод байж байна.  

Алба хаагчийг хар тамхичин шээлгээд зогсдог гэх ойлголт байж болохгүй. Хуулийн байгууллагын алба хаагчдыг гүтгээд "чамайг би шээлгэе" гээд байж байдаг зохисгүй зүйл ярихаа болих хэрэгтэй. 

Энэ төрлийн гэмт хэрэг 2022 оноос эхэлж үйлдэгдэж эхэлсэн. Одоогийн байдлаар өсвөр насны 13 хүүхэд нас барсан. Мөн 40 гаруй хүүхэд гар, хуруугаа тайруулсан. Ийм хор аюултай зүйлийг иргэд хууль бусаар борлуулж байна.

Сүүлийн жилүүдэд цагдаагийн газар болон хар тамхи тэмцэх газраас олон хэргийг илрүүлж, их хэмжээний бодисыг хурааж авч байна. Хар тамхитай тэмцэх газарт шалгагдаж байгаа, шүүхээр ял шийтгэл авч байсан этгээдүүд хар тамхитай тэмцэх газрын алба хаагчдыг гүтгэх нэр хүнд халдах тохиолдол нэлээд гарч байна. Тухайлбал, Хар тамхитай тэмцэх газрын алба хаагчид хураасан бодисоо худалдаалдаг, хэрэглэдэг гэсэн мэдээлэл гарч байгаа. Хар тамхитай тэмцэх газрын алба хаагчид улиралд бүр мансууруулах бодис хэрэглэсэн байна уу гэдгийг шалгадаг.

Мансууруулах бодисыг прокурорын хяналтад дор устгалд оруулдаг. Энэ оны нэгдүгээр улиралд шүүхээр эцэслэн шийдвэрлэсэн 151 хэргийн эд мөрийн баримтыг устгалд оруулсан. Тухайлбал, мөс гэх нэршилтэй бодис 249 грамм, канабис төрлийн ургамал 48 кг, 138 ширхэг мансууруулах үйлчилгээтэй эм, зүү дуслын системийг шатаах аргаар устгалд оруулсан” гэв.