Харвардын 15 мянган ам.долларын үнэтэй нэг жилийн хөтөлбөрт Эрүүл мэндийн яамны ТНБД Д.Очирбат хамаарал бүхий хүнээ хамруулсан гэх асуудал гарсан. Энэ талаар УИХ-ын гишүүн Д.Ганмаа өөрийн цахим хуудсандаа ийнхүү бичжээ. 

Тэрбээр “Эрүүл мэндийн удирдлага- HARVARD Leadership in Medicine. Harvard-д багшлах хугацаандаа санаачилж, санхүүжилтийг нь шийдвэрлэн, хөтөлбөрийг нь боловсруулж Harvard-аас Монголдоо нэвтрүүлсэн хөтөлбөрүүдийн нэг нь энэ билээ. Санаачилсан анхны T2T (Training to Teachers) хөтөлбөр эхэлснээс хойш 10-д жил өнгөрчээ. T2T нь T2C (Training to Clinicians) болон өргөжин, өдгөө Leadership in Medicine хөтөлбөр болон тасралтгүй хэрэгжиж байна.

Harvard Leadership in Medicine хөтөлбөр одоогоор гурав дахь удаагаа зохион байгуулагдаж байна.

Эдгээр ажлыг боловсрол шинжлэх ухаан, эрүүл мэндийн салбарын үе үеийн сайд, Төрийн нарийн бичгийн дарга нар болох Ц.Мөнх-Оргил, Л.Энх-Амгалан, Ц.Цогзолмаа, Б.Баярсайхан, С.Энхболд, Т.Мөнхсайхан, Ж.Чинбүрэн нар үргэлжлүүлэн хэрэгжүүлж ирсэнд талархал илэрхийлье.

Leadership in Medicine хөтөлбөр нь blended буюу танхимын болон цахим хосолсон хэлбэртэй бөгөөд зардлыг багасгах зорилгоор Монголоос тавьсан хүсэлтийн дагуу 2 удаагийн танхимын сургалтыг Азидаа зохион байгуулж, төгсөлтийн үйл ажиллагаа нь АНУ-ын Харвардын Анагаах Ухааны Их Сургууль (Harvard Medical School)-д зохион байгуулагддаг. Бүх багш нар нь АНУ-ын Харвардын сургуулиас томилогдон очиж заадаг гэдгийг онцолмоор байна. Суралцагч нарын анхан шатны сонгон шалгаруулалтыг ЭМЯ-наас зохион байгуулж, ЭМЯ-наас мэдүүлсэн хүмүүсээс англи хэл, бусад мэргэжлийн шалгалтыг Харвардын АУ сургууль дахин сонгон шалгаруулж авдаг. Сүүлийн хөтөлбөр дээр шалгуурт тэнцээгүй хүнийг шалгалтанд оруулж сонгон шалгаруулалт ашиг сонирхлын зөрчилтэй явагдсан тухай мэдээлэл гарсанд энэхүү хөтөлбөрүүдийг санаачлан хэрэгжүүлсэн хүний хувьд шаардлагатай бол Харвардын Анагаах ухааны их сургуулиар шалгуулж болно” гэжээ.