Монгол Улсын Ерөнхийлөгч Ухнаагийн Хүрэлсүхийн УИХ-ын гишүүнийг эгүүлэн татах заалт бүхий “Монгол Улсын Их Хурлын тухай хуульд нэмэлт, өөрчлөлт оруулах тухай” хуулийн төслийг санаачлан боловсруулсан. Уг хуулийн төслийг энэ сарын 09-ний өдөр Ерөнхийлөгчийн Тамгын газрын дарга А.Үйлстөгөлдөр УИХ-ын дарга Н.Учралд өргөн барьсан юм. 

Тэгвэл энэ хуулийн талаар Шүүхийн ерөнхий зөвлөлийн дарга асан Н.Лүндэндорж ингэж хэлжээ.

Тэрбээр "Парламентын жинхэнэ дархлаа өөрийнх нь гишүүдийн халдашгүй байдлын хана хэрэмд биш, харин гишүүдийнх нь хариуцлага, ёс зүй, Үндсэн хуулиа дээдлэн сахих чадварт оршино. Хариуцлага хүлээдэггүй, хүлээлгэдэггүй байдал нь парламентын дархлааг үгүй хийх төдийгүй ард түмэн парламентаас уйдахад хүрэх аюултай. Гишүүнийг эгүүлэн татах процессыг тодруулан хуульчлах санаачилга бол харин ч парламентын дархлааг бэхжүүлнэ. Эгүүлэн татах нөхцөл, процессыг тодорхой болгох нь гишүүдийг татах нь гэж харалгүй, татагдах үйлдлийг хийхгүй болгох хамгаалалт гэж харах нь зөв. Татагдах нөхцөлийг гишүүд хийхгүй бол хэн ч татагдахгүй" гэжээ.

Л.Баяр