Засгийн газрын ээлжит хуралдаан дуусаж, хуралдаанаас гаргасан шийдвэрийн талаар холбогдох сайд нар мэдээлэл хийлээ. Хэвлэлийн хуралд ЗГХЭГ-ын дарга С.Бямбацогт, Гэр бүл, хөдөлмөр, нийгмийн хамгааллын сайд Т.Аубакир, Дэд сайд Д.Мөнх-Эрдэнэ, Д.Энхтүвшин нар оролцож мэдээлэл өглөө.

ЗГХЭГ-ын дарга С.Бямбацогт: "Ирээдүй хойч үедээ өнөөдрийн байдлаар 6 их наяд орчим төгрөгийг хуримтлуулсан байна. Эрүүл мэнд, боловсрол, орон сууцандаа зарцуулахад зориулж 1 их наяд төгрөг хуримтлагдсан байна. Өнөөдөр амьдарч байгаа иргэд болон ирээдүйн иргэд маань тэгш хүртээмжтэй хуваарилагдах байгалийн өгөөжтэй байх үндсэн хуулийн зарчим алдагдсан байна. Тиймээс үүнийг иргэдтэйгээ зөвшилцье, зөвлөлдье, иргэдийнхээ санаа бодлыг сонсож байж үндэсний баялгийн сангийн хуваарилалтыг зөв болгоно.

Хоёрт. Иргэн бүрд нээгдсэн дансанд одоо 175 мянган төгрөг байгаа. Байгалийн баялгийн өгөөжийг хуримтлуулж буй Үндэсний баялгийн санг хэрхэн арвижуулах вэ?, өсгөх вэ?, үржүүлэх вэ? гэдэг дээр ажиллах шаардлагатай байна. Дээр хэлсэнчлэн иргэдээс орон даяар санал асуулга авна. Энэ зөвлөлдөх зөвлөлийг өнөөдрийн Засгийн газрын хуралдаанаар баталлаа. Бүрэлдэхүүнд орох иргэдийг нээлттэй сонгон шалгаруулсан. Есөн хүнтэй зөвлөлийг байгууллаа. УИХ-ын гишүүн асан, Хотын дарга асан Э.Бат-Үүл, МУИС-ын багш Н.Батнасан, УИХ-ын гишүүн асан Д.Лүндээжанцан, Хамба лам асан Д.Чойжамц болон Б.Лхагважав, Л.Төр-Од, Р.Хатансайхан, Н.Жанцан гэх бүрэлдэхүүнтэй зөвлөл байгуулагдлаа. Ойрын хугацаанд энэ зөвлөлдөх зөвлөл хуралдаж, санал асуулгын хүрээ хязгаар, асуумжийг боловсруулна. Хоёр үе шаттай явагдана. Үндэсний Статистикийн Хороо голлож ажиллана. Өөр бусад байгууллага оролцохгүй. Эхний үе шат 21 аймаг 330 суманд хүрч ажиллана. Мөн дөрөвдүгээр сарын дундуур Төрийн ордонд 800 хүний бүрэлдэхүүнтэй санал асуулга зохион байгуулагдахаар байна" гэв.