Засгийн газрын ээлжит хуралдаан дуусаж, хуралдаанаас гаргасан шийдвэрийн талаар холбогдох сайд нар мэдээлэл хийлээ. Хэвлэлийн хуралд ЗГХЭГ-ын дарга С.Бямбацогт, Гэр бүл, хөдөлмөр, нийгмийн хамгааллын сайд Т.Аубакир, Дэд сайд Д.Мөнх-Эрдэнэ, Д.Энхтүвшин нар оролцож мэдээлэл өглөө.

Т.Аубакир: "Хувийн нэмэлт тэтгэврийн тухай анхдагч хуулийн төслийг дэмжиж баталлаа. Энэ бол манай Монгол улсад хүлээлттэй байсан хуулиудын нэг. Хувийн нэмэлт тэтгэврийн сан хэдий эрхзүйн орчин байхгүй ч зарим байгууллагууд дээр 135.7 мянган хүн тэтгэврийн хуримтлал санал болгож буй даатгалын болон тэтгэврийн санд хамрагдаж, нийт хуримтлал 63.4 тэрбум төгрөгийн хуримтлалыг бий болгоод байна. Хувийн нэмэлт тэтгэврийн тухай анхдагч хуулийн төслийг холбогдох талуудын оролцоог ханган боловсруулж, Улсын Их Хуралд өргөн мэдүүлэхээр бэлтгэсэн. Ингэснээр Монгол Улс бусад улс орнуудын адил тэтгэврийн олон давхаргат тогтолцоонд шилжих юм. Иргэд хувийн нэмэлт тэтгэврийн хуримтлал үүсгэж, үүнээсээ сонгож тодорхой хугацаанд, мөн насан туршдаа тэтгэвэр авах нөхцөл бүрдэж байна. Хоёрдугаарт, Хувийн нэмэлт тэтгэврийн санд даатгуулсан мөнгөө нэг удаа бөөнд нь авах, өвлүүлэх гэх зэрэг зохицуулалтуудыг хийнэ. Мөн хөдөлмөрийн чадвараа алдсан тохиолдолд тэтгэвэр тогтоолгох эрх үүснэ. Мөн нас эцэслэсэн бол тэтгэврээ өвлүүлэх боломжтой энэ хуулийн төслийг энэ удаагийн засгийн газрын хуралдаанаар хэлэлцэж шийдвэрлэлээ" гэв.