Ардчилсан намын “4:11 мэдээллийн цаг” хэвлэлийн бага хурлын үеэр АН-ын дарга, УИХ дахь АН-ын бүлгийн дарга О.Цогтгэрэл дараах мэдээллийг өглөө.

Тэрбээр, “Бидэнд ирсэн шаардлагын хариуны агуулгыг авч үзвэл, АН-ын бүлгээс хүргүүлсэн шаардлага нь хууль зүйн үндэслэлтэй, мөн судалгаа хийж дүгнэлт гаргахад бодитой шаардлага гэж үзэхээр байна. Тухайлбал, дэд сайдын орон тоо болон төрийн данхар бүтцийг бууруулахтай холбоотой шаардлагыг агуулгын хүрээнд хүлээн авах боломжтой гэсэн байна. Үүнийг хэрэгжүүлэхэд хуулийн хүрээнд хамтран ажиллах боломжтой гэх хариу ирүүлжээ.

Хоёрдугаарт, АН-ын бүлэг өнгөрсөн даваа гарагт байр сууриа илэрхийлэхдээ УИХ-ын даргын албыг аль нэг намын дарга хавсран хашиж болохгүй гэж үзсэн. Иймээс УИХ-ын дарга намын даргын ажлаа өгөх хүртэл чуулганы нэгдсэн хуралдаанд оролцохгүй гэсэн шаардлагынхаа хүрээнд ажиллаж байна.

Өмнө нь ийм жишиг байсан уу гэсэн асуултад хариулахад, 2012 болон 2016 онуудад М.Энхболд, З.Энхболд нарын үед ийм жишиг байсан. Гэвч бид энэ буруу жишгийг засах ёстой. Буруу жишгийг хэвээр үргэлжлүүлбэл ямар үр дагаварт хүрдгийг өнгөрсөн жилүүдийн туршлага харуулсан.

Тухайлбал, АН-ын дарга З.Энхболд УИХ-ын даргын албыг хавсран хашсанаас хойш төрийн хямрал үүсэж, Ардчилсан нам дараалан гурван удаа ялагдал хүлээсэн. Үүний улмаас Монгол Улс нэг намын тогтолцоо руу орсон таагүй нөхцөл байдал бий болсон. Мөн М.Энхболд намын дарга, УИХ-ын даргын албыг хавсран хашиж байх үед, 2017–2018 онд Монголын төр, засгийн түвшинд ямар хямрал үүссэнийг та бүхэн мэдэж байгаа. Энэ нь буруу зүйлийг засаж залруулахгүй бол ямар үр дүнд хүрдгийг харуулж байна.

Ийм учраас Ардчилсан нам Д.Амарбаясгаланг УИХ-ын даргын албыг хашиж байх үед намын даргаар сонгогдоход ч мөн яг энэ байр сууриа илэрхийлж, ижил шаардлага тавьж байсан” гэв.