Нийслэлийн Иргэдийн Төлөөлөгчдийн Хурлын дарга А.Баярыг огцруулах асуудал улс төрийн хүрээнд анхаарал татаж эхэллээ. Тодруулбал, НИТХ-ын төлөөлөгч Б.Сэргэлэнбаатар НИТХ-ын даргыг огцруулах тухай албан бланк гарган, төлөөлөгчдөөс гарын үсэг цуглуулж эхэлсэн байна. НИТХ-ын төлөөлөгч Б.Сэргэлэнбаатарын тухайд Нийслэлийн Засаг дарга Х.Нямбаатарын ойрын хүн гэгддэг бөгөөд түүний санаачилсан энэхүү үйлдэл улс төрийн хүрээнд анхаарал татаад буй.
НИТХ нийт 45 төлөөлөгчтэй. Хэрэв тэдний 30 нь НИТХ-ын даргыг огцруулах санал бүхий албан бланкт гарын үсэг зурвал А.Баярыг албан тушаалаас нь чөлөөлөх боломж бүрдэнэ.
Мөн А.Баярыг огцорсон тохиолдолд түүний оронд НИТХ-ын даргаар томилогдох дараагийн хүн ч тодорхой болсон гэх мэдээлэл байна. Тодруулбал, НИТХ-ын төлөөлөгч Д.Ихбаярыг дараагийн даргаар томилох хувилбар улс төрийн хүрээнд яригдаж эхэлжээ.
Сануулахад, А.Баяр нь 2024 оны аравдугаар сарын 14-ний өдөр болсон НИТХ-ын хуралдаанаар нийт төлөөлөгчдийн 86.7 хувийн дэмжлэгийг авч НИТХ-ын даргаар сонгогдсон юм.
Д.Батчулуун
