Монгол Улсын Тэргүүн шадар сайд бөгөөд Эдийн засаг, хөгжлийн сайд Ж.Энхбаяр Бүгд Найрамдах Хятад Ард Улсаас Монгол Улсад суугаа Онц бөгөөд Бүрэн эрхт Элчин сайд Шэнь Миньжуанийг хүлээн авч уулзлаа.
Уулзалтын үеэр талууд Монгол Улс, Бүгд Найрамдах Хятад Ард Улсын иж бүрэн стратегийн түншлэлийн харилцаа, хамтын ажиллагаа, БНХАУ-ын 15 дахь таван жилийн төлөвлөгөөний хүрээнд хэрэгжүүлэх бодлого, зорилтуудыг хэлэлцлээ. Түүнчлэн тус төлөвлөгөөг Монгол Улсын хөгжлийн бодлого, төлөвлөлттэй уялдуулах, хоёр талын хамтын ажиллагааг бодит төсөл, хөтөлбөрийн талаар байр сууриа илэрхийлэв.
Талууд хоёр улсын боомтын хөгжлийн төлөвлөлтийг харилцан уялдуулах, хил дамнасан дэд бүтцийн бүтээн байгуулалтыг эрчимжүүлэх, тээвэр логистикийн нэвтрүүлэх чадварыг нэмэгдүүлэх чиглэлээр хамтын ажиллагааг өргөжүүлэх өргөн боломж байгааг тэмдэглэв. Энэ хүрээнд авто болон төмөр замын холболт, боомтын хүчин чадлыг нэмэгдүүлэх, ухаалаг боомтын шийдлийг нэвтрүүлэх асуудлаар ярилцлаа.
“Монгол Улс, Оросын Холбооны Улс, Бүгд Найрамдах Хятад Ард Улсын эдийн засгийн коридор байгуулах хөтөлбөр”-ийн стратегийн ач холбогдлыг онцолж, гурван улсын хамтын ажиллагааны энэхүү чухал механизмыг идэвхжүүлэх, хэрэгжилтийг эрчимжүүлэх чиглэлээр нягт хамтран ажиллахаар санал нэгдэв.
Түүнчлэн Монгол, Хятадын Засгийн газар хоорондын комиссын ээлжит хуралдааны бэлтгэл ажлын явц, зохион байгуулах тов хугацаа болон хуралдаанаар хэлэлцэх асуудлын хүрээний талаар дэлгэрэнгүй ярилцаж, холбогдох байгууллагуудын түвшинд үргэлжлүүлэн нягт уялдаатай ажиллахаар тохиролцов.
