Зүүн Азийн волейболын аварга шалгаруулах тэмцээнд эх орноо төлөөлөх Монголын шигшээ багийн бүрэлдэхүүнд анхаарал татах тоглогчдоор Тамираагийн Хангал, Баттөрийн Батсуурь нарыг нэрлэж болно.
Т.Хангал нь Монголын эрэгтэй волейболын шинэ үеийн төлөөлөл бөгөөд гадаадын мэргэжлийн лигт тоглосон анхны эрэгтэй монгол волейболчдын нэг болж, эх орныхоо нэрийг олон улсын талбайд гаргасан тамирчин юм.
Т.Хангал волейболын удамтай гэр бүлээс төрсөн. Түүний өвөө нь волейболын нэрт дасгалжуулагч, гавьяат багш Д.Ренчин, аав Р.Тамир нь дээд лигийн түвшинд тоглож байсан тамирчин, дасгалжуулагч бөгөөд ээж Д.Наранцэцэг мөн волейболын спортын мастер цолтой тамирчин байжээ. Ийнхүү багаасаа волейболын орчинд өссөн тэрбээр гуравдугаар ангиасаа энэ спортоор хичээллэж эхэлсэн байна.
192 см өндөртэй Т.Хангал хүчтэй довтолгоо, үсрэлт, оноо авах чадвараараа ялгардаг. Тэрбээр 2022 онд Тайландын дээд лигийн Nakhon Ratchasima клубт тоглож, Монголын эрэгтэй волейболчдоос гадаадын мэргэжлийн лигт гарсан анхдагчдын нэг болсон. Мөн Тайландын лигт амжилттай тоглож, аварга болон шилдэг довтлогчийн шагнал хүртэж байв.
Харин Б.Батсуурь бол Монголын шигшээ багийн туршлага, тогтвортой байдлыг авч явах чухал тоглогчдын нэг юм. Тэрбээр үндэсний тэмцээнүүдэд тогтмол оролцож, эрэгтэй волейболын дотоодын өрсөлдөөнд өөрийн байр суурийг бий болгосон тамирчин. Мөн гадаадын лигүүдэд нэрээ цуурайтуулж явсан.
Монголын багийн хувьд Т.Хангалын хүчтэй довтолгоо, Батсуурийн туршлага, тоглолтын уншилт нь Азийн хүчирхэг багуудын эсрэг өрсөлдөхөд чухал үүрэг гүйцэтгэх боломжтой. Ялангуяа Япон, БНХАУ, БНСУ зэрэг өндөр түвшний багуудтай тоглоход ганц хоёр тоглогчийн ур чадвараас гадна багийн уялдаа, сэтгэлзүй, туршлага хамгийн их нөлөөлнө.
2026 оны Зүүн Азийн аварга шалгаруулах тэмцээн бол Т.Хангал зэрэг шинэ үеийн тамирчдад өөрийгөө батлах, харин Батсуурь шиг туршлагатай тоглогчдод багийг манлайлах том боломж болох юм. Монголын волейболын ирээдүйг тодорхойлох энэ тэмцээнд тэдний тоглолт хөгжөөн дэмжигчдийн хамгийн их хүлээлттэй мөчүүдийн нэг байх нь гарцаагүй.
Л.Баяр
