Кантри хөгжмийн домог, дуучин, ая зохиогч, жүжигчин, хүмүүнлэгийн үйлстэн Долли Партон наймдугаар сарын 25-нд АНУ-ын Теннесси мужийн Нэшвилл хот дахь гэртээ 80 насандаа таалал төгслөө гэж түүний гэр бүлийнхэн мэдэгджээ. Түүний зээ хүү Брайан Сиверийн мэдээлснээр, Долли Партон тайван амгалан нас барсан бөгөөд гэр бүлийн хүрээнд хувийн ёслол хийхээр төлөвлөж байна.

Долли Партон хагас зуунаас илүү үргэлжилсэн уран бүтээлийн замналдаа 3,000 гаруй дуу бичиж, кантри хөгжмийг дэлхий дахинд таниулсан хамгийн нөлөө бүхий уран бүтээлчдийн нэг болсон юм. Түүний “Jolene”, “I Will Always Love You”, “Coat of Many Colors” зэрэг дуунууд хөгжмийн түүхэнд үлджээ. Мөн 1980 онд гаргасан “9 to 5” дуу нь ижил нэртэй киноны гол дуу болж, эмэгтэйчүүдийн хөдөлмөр эрхлэлт, тэгш эрхийн тухай бэлгэ тэмдэг болсон байна. Партон уг кинонд өөрөө тоглосон юм.

Тэрээр нийт 49 цомог гаргаж, 11 удаа Грэммийн шагнал хүртсэн бөгөөд кантри хөгжмөөс поп хөгжмийн зах зээлд амжилттай нэвтэрсэн уран бүтээлчдийн нэг байв. Кенни Рожерстэй хамтран дуулсан “Islands in the Stream” зэрэг дуунууд нь олон улсын хит болжээ.

Гэвч Долли Партон зөвхөн хөгжмийн уран бүтээлээрээ бус, буяны үйлсээрээ дэлхийд танигдсан юм. Түүний байгуулсан "Imagination Library" хөтөлбөрөөр дамжуулан дэлхийн өнцөг булан бүрийн хүүхдүүдэд 300 сая гаруй ном үнэгүй хүргэсэн байна.

Тэрээр амьдралынхаа сүүлийн жилүүдэд эрүүл мэндийн асуудалтай тулгарч байсан бөгөөд нөхөр Карл Дин нь 2025 оны гуравдугаар сард нас барсны дараа өөрийгөө анхаарал халамжгүй орхисноо Партон өмнө нь ярьж байжээ.

Долли Партон бол зөвхөн кантри хөгжмийн хатан хаан төдийгүй олон үеийн уран бүтээлчдэд нөлөөлсөн, эмэгтэйчүүдийн эрх, боловсрол, хүүхдийн сайн сайхны төлөө дуу хоолойгоо өргөсөн дэлхийн хэмжээний соёлын бэлгэ тэмдэг байлаа. 

Л.Баяр