Британийн нэрт жүжигчин, дуучин Тим Карри 80 насандаа таалал төгсжээ. Тэрээр “The Rocky Horror Picture Show” киноны доктор Фрэнк-Н-Фёртер, Стивен Кингийн “It” зохиолоос сэдэвлэсэн 1990 оны телевизийн бүтээлийн аймшгийн алиалагч Пеннивайзын дүрээр дэлхий даяар танигдсан юм. Карри наймдугаар сарын 25-нд АНУ-ын Лос-Анжелес хотын Толука-Лейк дэх гэртээ тайван байдлаар нас барсан байна. Түүний нас барсан шалтгааныг одоогоор мэдээлээгүй байна.

1946 онд Их Британийн Чешир хотод төрсөн Тим Карри урлагийн салбарт 50 гаруй жил ажиллажээ. Түүний нэрийг дэлхий дахинд таниулсан бүтээл нь 1975 онд нээлтээ хийсэн “The Rocky Horror Picture Show” байв. Тэрээр тус кинонд доктор Фрэнк-Н-Фёртерийн дүрийг бүтээж, өвөрмөц төрх, хоолой, жүжиглэлтийн хэв маягаараа үзэгчдийн анхаарлыг татсан юм. Кино нь анх гарсан үедээ төдийлөн амжилт олоогүй ч хожим “культ” бүтээл болж, олон арван жилийн турш шүтэн бишрэгчидтэй болсон.

1990 онд Карри Стивен Кингийн “It” зохиолоос сэдэвлэсэн телевизийн мини цувралд Пеннивайзын дүрд тоглосон. Түүний бүтээсэн аймшгийн алиалагч нь тухайн үеийн үзэгчдийн сэтгэлд хүчтэй үлдэж, өнөөдөр ч “It”-ийн хамгийн алдартай дүрслэлүүдийн нэгт тооцогддог.

Тим Карри кино, телевизээс гадна театрын тайзнаа амжилттай ажиллаж байв. Тэрээр “Amadeus”, “My Favorite Year”, “Spamalot” зэрэг бүтээлд тоглож, “Tony” шагналд гурван удаа нэр дэвшсэн байна. Мөн “Peter Pan and the Pirates” хүүхэлдэйн цувралын Ахмад Хукын дүрээр “Daytime Emmy” шагнал хүртжээ.

Түүний тоглосон бусад алдартай бүтээлд “Clue”, “Home Alone 2”, “The Hunt for Red October”, “Annie”, “Scary Movie 2” зэрэг кино багтдаг. 2012 онд Карри хүнд хэлбэрийн цус харвалтад орж, улмаар хөдөлгөөнд нь хүндрэл учирсан ч уран бүтээлээ бүрэн орхилгүй, дуу оруулах болон жүжиглэх ажлаа үргэлжлүүлсэн юм.

Тим Карригийн өвөрмөц хоолой, тайзны хүчтэй дүр төрх, этгээд бөгөөд мартагдашгүй дүрүүд нь түүнийг кино, театрын түүхэнд онцгой байр суурь эзлэх уран бүтээлч болгож үлдээлээ.

Л.Баяр