Египетийн телевизийн хөтлөгч Сара Халифа хар тамхи үйлдвэрлэн, хууль бусаар борлуулдаг зохион байгуулалттай бүлэглэлд оролцсон хэргээр 11 хүний хамт цаазаар авах ял сонслоо. Каирын Эрүүгийн шүүхээс өнгөрсөн бямба гарагт 39 настай Сара Халифа болон бусад 11 хүнд дүүжилж цаазлах ял оноож, тус бүрийг нь 500 мянган египет фунт буюу ойролцоогоор 9800 ам.доллароор торгосон байна.

Тэднийг хар тамхи үйлдвэрлэхэд ашигладаг түүхий эдийг гадаадаас оруулж ирэн, синтетик хар тамхи үйлдвэрлэж, борлуулах зорилготой зохион байгуулалттай гэмт бүлэглэл байгуулсан гэж буруутгажээ. Мөн зөвшөөрөлгүй галт зэвсэг, сум хэрэгсэл эзэмшсэн хэрэгт холбогдуулсан байна.

Уг хэрэгт нийт 28 хүн яллагдагчаар татагдсан бөгөөд шүүхээс есөн хүнд бүх насаар нь хорих ял оноож, долоон хүнийг цагаатгажээ. Мөрдөн шалгах ажиллагааны үеэр 750 гаруй килограмм хар тамхи болон түүнийг үйлдвэрлэхэд ашигладаг түүхий эдийг хураан авч, орон сууцны зориулалттай хоёр байрнаас хууль бус лаборатори илрүүлсэн байна. Мөн галт зэвсэг, сум хэрэгсэл олджээ.

Сара Халифа өөрт нь тавьсан бүх буруутгалыг няцааж, гэм буруугүй гэдгээ мэдэгдсэн байна.Тэрбээр мөрдөн байцаалтын үеэр “Би амьдралдаа нэг ч удаа тамхи татаж байгаагүй” хэмээн мэдүүлжээ. Шүүхийн шийдвэр гарах үеэр Халифа уйлан, өөрийг нь сонсохыг шүүхээс хүссэн талаар Египетийн хэвлэлүүд мэдээлсэн байна.

Халифа нь Египетэд гэмт хэрэг, аюулгүй байдлын асуудлыг хөнддөг “Mission Impossible” телевизийн нэвтрүүлгийг хөтөлж байснаараа олонд танигдсан. Тэрбээр телевизийн хөтлөгчөөс гадна гоо сайхны мэс заслын эмнэлэг болон арга хэмжээ зохион байгуулдаг компанитай бөгөөд Instagram платформд 2.5 сая орчим дагагчтай аж.

         Түүнийг 2025 оны дөрөвдүгээр сард уг хэргийн мөрдөн шалгах ажиллагааны хүрээнд баривчилсан байна. Шүүхийн шийдвэрийг гаргахын өмнө Египетийн Их Муфтигаас шашны байр суурийг нь авсан нь тус улсын хуульд заасан цаазаар авах ялтай холбоотой заавал мөрдөх процедур юм. Гэхдээ Муфтийн санал нь шүүхэд заавал дагаж мөрдөх шийдвэр биш байна.

Халифа болон бусад ял шийтгүүлсэн хүмүүс уг шийдвэрийг давж заалдах эрхтэй. Мөн Халифад тусдаа хэрэгт жолоочоо зодож, дүрс бичлэг хийсэнтэй холбоотойгоор гурван жилийн хорих ял оноосон байна. Египет улс хар тамхины наймаа, терроризм болон санаатай хүн амины зэрэг хүнд гэмт хэрэгт цаазаар авах ялыг хэрэглэдэг.

Л.Баяр