“Дижитал” хамтлагийн ахлагч асан Баавар шатаж, түлэгдэн эмнэлэгт хүргэгдсэн явдал ШШГЕГ-ынхныг асуудалд орууллаа.
     “Дижитал” хамтлагийн ахлагч асан Баавар шатаж, түлэгдэн эмнэлэгт хүргэгдсэн явдал ШШГЕГ-ынхныг асуудалд орууллаа. Гадны нөлөөтэй ч бай, өөрийгөө шатаахыг завдсан ч бай уг асуудалд ШШГЕГ хариуцлага хүлээнэ. Учир нь хоригдож буй сэжигтний биед хүйтэн мэс, гал, өөрийнхөө болон бусдын биед гэмтэл учруулах зүйл байхыг хориглодог. Тэгэхээр Баавар өөрийгөө шатаахыг завдсан бол ШШГЕГ-ын харьяа хорих 461 дүгээр ангийнхны хариуцлагийн асуудалд хөндөгдөнө. Баавар өөрийгөө шатаах хэрэгслийг тэд яагаад Бааварын биеэс хурааж аваагүй вэ, хэрвээ гадны нөлөөтэй бол гал юунаас эхэлж гарав, гал гарлаа гэхэд хүнийг тэгтлээ түлэгдтэл яагаад арга хэмжээ авсангүй вэ гэдгээс эхлээд асуудал ундарна.

    Юутай ч ШШГЕГ-аас Бааварыг өөрийгөө шатаахыг завдсан гэх тайлбарыг өгч буй. Гэхдээ бүр “Баавар нь гаднаас гал гарах зүйл авч орсон байж болзошгүй хэмээн сэжиглэж байгаа” гэх тайлбарыг хорих 461 дүгээр ангийн удирдлага өгсөн. Харин үүнд Бааварын өмгөөлөгчид “Бааварын биед гал гаргах хэрэгсэл байна гэдэг боломжгүй. Хорих ангийн дотоод журамд энэ бүх зүйлийг хориглодог. Байлаа гэхэд хорихын хуягууд хурааж авсан л байж таараа. Хэрвээ хурааж аваагүй бол яагаад вэ. Ер нь тэгээд ч гар, хөлөндөө гав, дөнгөтэй хүн яаж өөрийгөө шатаах вэ” гэсэн хариултыг өгөв.

    Үнэхээр ч Баавар гал гарах үед гар хөлөндөө гав, дөнгөтай байсан гэдэг. Үүнийг ч ангийн удирдлагууд хүлээн зөвшөөрдөг. Тодруулбал, 461 дүгээр ангийн дэд дарга Б.Өлзийбат “Бид хуулиар олгогдсон эрх үүргийнхээ дагуу нөхцөл байдлаас хамаарч тусгай хэрэгсэл хэрэглэх эрхтэй” гэсэн юм. Тэгэхээр гар хөлөндөө гав, дөнгөтэй хүн өөрийгөө яаж шатаах вэ гэсэн асуултад ШШГЕГ-ынхан хариулах ёстой. Гэвч өнөөдрийг хүртэл тэд албан ёсоор тайлбар хийсэнгүй.

    Олон нийтийг ийнхүү төөрөгдүүлж байна. Бааварыг өөрийгөө шатаасан уу, гадны нөлөөтэй юу гэдэгт хүн бүр өөр өөрийн дүгнэлтээ өгч байна. Тэгэхээр олон нийтийн төөрөгдлийг арилгаж, үнэн мөнийг олох ганц арга бол гал гарах үеийн камерийн бичлэгийг олон нийтэд дэлгэх. Гэтэл ШШГЕГ-аас “Байгууллагын дотоод журмын дагуу хориотой” гэсэн хачирхалтай хариултыг өглөө. Дотоод журамдаа заасан л байдаг байх. Тэгвэл МАХН-ын дарга Н.Энхбаярын хоригдож байх үеийн бичлэгийг олон нийтэд дэлгэсэн нь дотоод журамд хамаарахгүй хэрэг үү.

    Тэд адилхан л хоригдож байсан сэжигтнүүд. Адилхан л иргэн. Тийм байтал яагаад ийнхүү ялгаварлав. Н.Энхбаярын бичлэгийг олон нийтэд дэлгэх нь дотоод журам биш. Харин Бааварынхыг дэлгэх нь дотоод журам уу. Эсвэл Төрийн өндөр албан тушаал хашиж байсан болохоор Н.Энхбаярын бичлэгийг дэлгэсэн хэрэг үү.

    Н.Энхбаярын бичлэгийг дэлгэхдээ бүр ШШГЕГ-аас хэвлэлийн бага хурал зарлаж байгаад л нийтэд дэлгэж байв. Гэтэл Бааварын асуудалд тэс хөндлөн хариулт өгч байна. Дотоод журамдаа заасан байлаа ч Баавар үнэхээр өөрийгөө шатаахыг завдсан бол бичлэгийг дэлгэх нь ШШГЕГ-ынханд ашигтай. Эс тэгвээс ШШГЕГ-ынхан Бааварыг гадны нөлөөтэй шатаасан гэх асуудалд уначих болоод байна.

    Тиймээс ШШГЕГ-ынхаан. Н.Энхбаяр хоригдож байхдаа ингэж салаавч гаргасан, гэрийнхэн нь Н.Энхбаяртай ингэж уулзаж байсан гээд он сар, цаг нартай нь гаргасан шигээ Баавар өөрийгөө яг ингэж шатаахыг завдсан гээд бичлэгийг нь дэлгэчихвэл яасан юм бэ. Угаасаа танайхаас Баавар өөрийгөө шатаахыг завдсан гэх тайлбарыг өгч л байгаа хойно.