Монголын харшил судлалын нийгэмлэгээс энэ сарын 8-15 хүртэл  “Харшилтай тэмцэх дэлхийн долоо хоног-2013” арга хэмжээг өрнүүлж буй талаараа сэтгүүлчдэд мэдээллээ.
   
    Дэлхийн харшлын байгууллагаас санаачлан “Хүнсний харшил-Дэлхий дахинд тулгамдаж буй эрүүл мэндийн асуудал” сэдвийн дор дэлхийн 93 оронд харшлын эсрэг “Харшилтай тэмцэх долоо хоног-2013” арга хэмжээ зохион байгуулж буй аж.
 
    Дээрх нийгэмлэгээс харшлын талаар иргэдэд зөв мэдээлэл өгөх, харшлын эмч, сувилагч нарыг сургалтад хамруулах, харшлаас урьдчилан сэргийлэх талаар хүмүүст  мэдлэг өгөх зорилгоор  сургалт зохион байгуулахаар болжээ. Дэлхийн хүн амын 30-40 хувь нь харшлын өвчнөөр өвчилж байгаагаас 24-30 хувийг ургамлын тоосны харшил эзэлж буй аж. Түүнчлэн 2020 он гэхэд дэлхийн хүн амын 50 хүртэлх хувь нь ямар нэгэн шалтгаантай харшлаар өвчлөх магадлалтай гэсэн судалгаа гарчээ. Хүмүүсийн хэрэглэж буй хоол хүнсний 15-20, эм тарианы 20-25 хувь нь харшил үүсгэх  магадлал өндөр байдаг байна. Мөн 700 гаруй зүйл ургамлын цэцгийн дохиурын тоос, үйлдвэр ахуйн холимог тоос, химийн төрөл бүрийн бодис, агаарын бохирдол болон бидний хүрээлэн буй гадаад орчны олон хүчин зүйлсээс  харшил үүсдгийг эрдэмтэд тогтоосон байна.

    Монголчуудын хувьд улирлын шинжтэй харшлын өвчин ихэсдэг аж. Тухайлбал өвлийн улиралд утаа, хавар тоос, зун нар, ургамлаас  шалтгаалан  харшил сэдэрдэг байна. Харшлын өвчин  удамших магадлал өндөр байдаг гэнэ. УКТЭ-ийн харшлын кабинетэд 8000-10000 харшилтай хүн үйлчлүүлж байгаагаас  30 хувь нь хоол хүнсний харшилтай байдаг хэмээн эмч мэргэжилтнүүд ярилаа.