Хүүхэд гэр, бүл хөгжлийн “Өнөр бүл" төв насанд хүрээгүй 14 хүүхдийг Хөх хотод сургуульд суулгах нэрээр хилээр гарган тариан талбайд ажиллуулж, малын хашаа хороо цэвэрлүүлж  байжээ. Уг хэргийг Мөрдөн байцаах газар шалгаж байна хэмээн хэвлэл мэдээллийн хэрэгслээр өчигдөр цацагдсан.

Хэвлэлээр цацагдсан эл мэдээлэлд хариу өгч өчигдөр Хүүхдийн төлөө үндэсний газар, Хүүхэд гэр, бүл хөгжлийн “Өнөр бүл” төвөөс шуурхай мэдээлэл хийв. Тэд “Хүүхэд, гэр бүл хөгжлийн “Өнөр бүл“ төвийн удирдлага зургаан сарын өмнө солигдсон. Удирдлага солигдохоос өмнө эл явдал өрнөсөн.  14 хүүхдийг Өвөр Монголын "Монгол үндэсний" сургуульд гэрээгээр сурахаар өмнөх дарга Алтай зөвшөөрч явуулсан гэлээ.
    Шинэ удирдлага Б.Бурмаа 14 хүүхдийн хичээл сурлагын байдал ямар түвшинд байгаа, амьдрах орчин нөхцөлд дүн шинжилгээ хийхээр явж,  хүүхдүүдтэй уулзжээ. Түүнийг очиход хичээл сурлагын хувьд сайн биш, хятад хэлийг тааруухан сурсан, дунд сургуулийн хүүхдүүдийн мэдэх ёстой мэдлэг нь хоцрогдсон байж. Тиймээс хүүхдүүдийг хичээлийн хоцрогдолд орж байна гэж дүгнээд эргүүлээд авчиръя гэж шийдвэрлэжээ. Ингээд “Өнөр бүл" төвийн хоёр багш, шинээр томилогдсон захирал нь энэ сарын 24-нд хүүхдүүдийг эх оронд нь авчирсан байна. Хүүхэд бүгдээрээ эрүүл саруул ирж, сургуульдаа суралцаж байна” хэмээн мэдээлэв.
Хүүхдийн төлөө үндэсний газар шинэ зохион байгуулалтад орж байгууллагын чиг үүргийн хүрээнд тус асрамжийн даргыг өөрчлөн Б.Бурмааг томилжээ.

    УИХ-ын Нийгмийн бодлого, боловсрол, соёл, шинжлэх ухааны байнгын хорооны дарга З.Баянсэлэнгэ  өнгөрсөн хоёрдугаар сард тус төвийн багачуудтай уулзаж, нэг өдрийг хамт өнгөрөөсөн. Тэр үед тэрээр “Тус төвд нийт  190 гаруй хүүхэд хүмүүжиж  байгаа. Хүүхдийн эрхийг зөрчсөн байдал багагүй  ажиглагдаж байсан. Хүүхэд нийгэмд гараад амьдрах чадваргүй, нийгмийн үйлчилгээг хаанаас яаж авах, тэр бүү хэл ямар автобусанд сууж хаана хүрэхээ ч мэдэхгүй хүүхэд олон байна. Тиймээс өнөөдөр энэхүү асрамжийн төвийн хүүхдүүдийг Өргөө кино театрт кино үзүүллээ. Төр засаг өнгөрсөн хугацаанд Монголын ирээдүй болсон хүүхэд багачуудаа хаясан, хайхралгүй орхисон нь харагдаж байна. Цаашид хүүхэд асран хүмүүжүүлэх төвийн хүүхдүүдээ бүртгэх, эцэг эх, асран хамгаалах хүнтэй эсэх талаар судалгаа явуулж, бүтэн өнчин хүүхдүүдээ нийгэмшүүлэх, амьдрах чадварт сургах талаар анхаарч ажиллана” хэмээж байсан.  Хоёрхон сарын өмнө тус төвөөр очихдоо  З.Баянсэлэнгэ дарга хүүхдийн эрх зөрчигдсөн энэ байдлыг мэдээгүй өнгөрсөн үү. Эсвэл мэдсэн  ч мэдээгүй юм шиг өнгөрөв үү.

    “Бид нэн тэргүүнд хүүхдүүдийг хөгжүүлэх, нийгэмшүүлэх үүднээс энэ жилээс эхлэн гэр бүлд түшиглэсэн хувилбарт хөтөлбөр хэрэгжүүлж эхэлж байна. Хүүхэд үрчлэх хүсэлт тавьсан гэр бүлтэй нягт хамтран ажилладаг” гэх мэтээр их л сайхан зүйл ярьж байсан. Гэтэл эцсийн дүнд хүүхдээр бизнес хийж байсан хуучин удирдлагуудын хууль бус үйлдлийг мэдээгүй өнгөрчээ.
   
    Анх 1974 онд "Асрахын цэцэрлэг" нэртэйгээр байгуулагдаж, 1979 онд Хүүхэд асран хүмүүжүүлэх төв болж байсан бол 2013 оны нэгдүгээр сараас эхлэн  хүүхэд гэр бүл хөгжлийн “Өнөр бүл” төв хэмээн нэр болон бүтэц, зохион байгуулалтаа өөрчилжээ. Одоогоор 600 гаруй хүүхдийг төгсгөн гаргаж, дотоодын хийгээд Энэтхэг, Герман, Америк, Франц, Хятад зэрэг улсад их, дээд сургуульд суралцуулсан байна. Энэ жил тус төвийг таван хүүхэд төгсөнө. Мөн Өвөр Монголын өөртөө засах орны  /ӨМӨЗО/ монгол үндэстний их сургуульд 14 хүүхэд  суралцаж байсан нь өнөөх хууль бусаар гадагшаа гаргасан хүүхдүүд юм. Ямартаа ч хүүхдүүдийн нэгтэй ч болов уулзаж хэрэг явдлын талаар асуух, эсвэл эл төвийн удирдлагуудтай уулзаж энэ талаар тодруулахаар тус төвийн зорив.

    Хашаанд нь хүүхдэд зориулсан тоглоомын талбай ч байхгүй, ганц шийд, саравчнаас өөр юмгүй эл хуль хашаанд гурван давхар шар байранд тус төв байрлажээ. Хэрэг явдлаас болоод ч тэрүү нэг ч хүүхэд гадагшаа гаргахгүй байгаа бололтой. Төвийн хаалгаар орвол засвар хийгээд шавар, замаска тэр аяараа байв. Намайг харсан үүдний жижүүр бололтой залуу ухас хийн өөдөөс гарч ирж, ямар зорилготой ирснийг маань шалгаалаа. Учир байдлаа хэлж асрамжийн төвтэй танилцах гэтэл дарга гурван хоногийн сургалтанд өнөөдрөөс сууж байгаа. Хэвлэл мэдээллийнхнээс хэнийг ч оруулж болохгүй хэмээсэн гээд хаалга хааж зогсоод оруулсангүй.

Ирсний хэрэг эл төвийн ойролцоо байрладаг мөн хүүхдүүдээс нь суралцдаг 53 дугаар сургууль, 44 дүгээр сургуулийн ажилчидтай уулзлаа. Энэхүү асрамжийн төвөөс дээрх сургуулиудад суралцаж буй хүүхдүүдээс  Хөх хотруу эсвэл ямар нэг улс руу суралцахаар явж байсан эсэхийг тодруулахад,  “Манай сургуульд сурч байсан хүүхдүүдээс урд хөршид сурна хэмээн олон хүүхэд явж байсан. Өнөөдөр гарсан мэдээллүүдийг харлаа. Арай ч дээ, үгүй байлгүй дээ гэж бодоод л сууж байна” гэсэн юм.   Эх сурвалжийн мэдээлснээр уг хэргийг Улсын мөрдөн байцаах газарт шалгаж байгаа юм байна. Бид эл мэдээллийн мөрөөр эргэн сурвалжлах болно.