Бусадтай бүлэглэн их хэмжээний мөнгө угаасан хэрэгт сэжиглэгдэн, байцаагдаж байх явцдаа оргон зайлсан хэргээр эрэн сурвалжлагдсан гэх “Ноёд” группийн захирал Г.Буяндоржийн тухай 24 баримтыг хүргэж байна.

1.   Түүний аав Гүнгэрэгжав Завхан аймгийн Сонгино сумын харъяат. Харин ээжийнх нь нэрийг Дулмаа гэдэг. Г.Буяндорж Сэлэнгэ аймгийн Зүүн хараа суманд Гүнгэрэгжавын 13 хүүхдийн найм дахь нь болж төржээ.

2.    Хожим аавынхаа төрсөн нутагт эхнэрийнхээ хамтаар "Ламын 13 овоо" цогцолборыг  босгосон гэдэг.

3.    Цагаан сарын өмнөх өдөр төрсөн болохоор ээж аав нь бэлгэшээж Буяндорж гэдэг нэрийг түүнд хайрлажээ.

4.    1990 онд Сэлэнгэ аймгийн Бугант суманд 10 дугаар ангиа төгссөн. 1-10 хүртлээ онц сайныг хольж сурсан тухайгаа тэрээр хэвлэлд өгсөн ярилцлагадаа дурджээ.

5.    Санхүү эдийн засгийн сургууль болон цагдаагийн сургуулийг дүүргэсэн. Хуульч, эдийн засагч мэргэжилтэй.

6. 1996 он хүртэл цагдаагийн хэлтэст эдийн засгийн төлөөлөгчөөр ажиллаж байсан. Энэ хугацаанд ерөнхий газрын ажил мэргэжлийн аваргаар гурван удаа шалгарч байжээ.

7.    1996 оноос иргэд ганзагын наймаа руу хуйларч, нийгэм тэр аяараа зах зээлийн системд идэвхтэй орох үед Г.Буяндорж бизнес эрхэлж эхэлжээ.

8. Тэрээр хүүхэд байхдаа Зүүнхараагийн спиртийн үйлдвэрээс гардаг хаягдал будааны ша¬рыг зөөж гахайгаа тэжээдэг байсан гэдэг. Хожим Сэлэнгэ аймгийн хүнсний үйлдвэрийг худалдаж аван өргөжүүлж, 2002 онд Дархан-Уул аймагт өөрийн эзэмшлийн үйлдвэрийг байгуулжээ.

9.    10 жил тасралтгүй ажиллуулсан спиртийн үйлдвэрээ тэрээр даян аварга А.Сүхбатад зарсан.

10.  Тэрээр МАН-ын Бага хурлын гишүүн. 2001 онд МАХН-д одоогийн /МАН/-д элсэж байжээ. Одоо ч тус намын үйл ажиллагаанд идэвхтэй оролцдог.

11.   Сингапур улсад бизнесийн удирдлагын чиглэлээр суралцаж байсан.

12.   МУГЖ, дуучин Т.Ариунаа бол түүний эхнэр. Тэд 1997 онд танилцжээ. Монголын залуучуудын жилд зориулан Сэлэнгэ аймагт тоглосон Т.Ариунаагийн тоглолтын ерөнхий зохион байгуулагч нь Г.Буяндорж болсноор тэдний амьдралын эхлэл тавигдсан гэдэг.

13. Тэрээр эхнэрийнхээ талаар “Миний хань бол хамгийн гайхалтай эмэгтэй. Хамгийн зарчимч, хамгийн хариуцлагатай эзэгтэй. Хүүхдүүдийн маань сайн ээж, айл гэрийн маань сайн эзэгтэй” гэж ярьжээ.

14.   Г.Буяндорж Т.Ариунаагаас зургаа дүү ба энэ жил 40 настай. Тэд хоёр хүүтэй.

15.    Тэрээр дуучин Т.Ариунаатай гэрлэхээсээ эхнэр, хүүхэдтэй байсан.

16.  Түүнийг отгон аварга Г.Эрхэмбаяртай ах дүүгийн барилдлагатай гэдэг. Г.Буяндорж  Г.Эрхэмбаяр аваргад таван өрөө байр амалчихаад өгөлгүй зугтсан гэж хэвлэлээр шуугисан ч энэ яриаг отгон аварга эрс үгүйсгэсэн юм.

17.     Далай лам, буддын шашин, нутгийн шүтээн уул, бөх, морь гээд түүнд шүтдэг олон зүйл бий. Мөн уран зураг сонирхдог байна.

18.     Түүнийг өнгөрсөн УИХ-ын сонгуулиар Сэлэнгэ аймагт МАН-аас нэр дэвшинэ гэж ярьж байсан ч тэрээр нэр дэвшээгүй юм.

19.     Г.Буяндоржийн тухай хамгийн сүүлд гарсан сонирхолтой мэдээлэл нь түүнийг мөрдөн байцаалтын явцад оргон зайлсан хэрэгт буруутган, Нийслэлийн прокурорын газраас эрэн сурвалжилж эхэлсэн гэх мэдээлэл байлаа.

20.    Түүнийг бусадтай бүлэглэн их хэмжээний мөнгө угаасан байж болзошгүй гэх хэрэгт сэжиглэн эрүүгийн хэрэг үүсгэн шалгах явцад  оргон зайлсан буюу ор сураггүй алга болсон хэрэгт буруутган, эрэн сурвалжилж эхэлсэн тухай албаны эх сурвалж хэлсэн юм.

 21. Энэ хэрэг Г.Буяндоржийн нэр холбогдсон анхны хэрэг биш юм. 2008 онд орлогын албан татвараас зайлсхийсэн, төрийн цагдаа нарт авилга өгсөн хэрэгт сэжиглэж байсан ч шүүхээс тус хэргийг хэрэгсэхгүй болгосон юм. Тус хэрэгт холбогдуулан “Ноёд” группийн санхүүгийн албаны дарга Д.Мөнхзул, нягтлан бодогч К.Ергали, Б.Гантулга, П.Энхцэцэг нарын хэд хэдэн хүнийг саатуулан шалгаж, 10 сая төгрөгийн хахууль авсан мөрдөн байцаагч Д.Бямбадорж, Д.Саруул нарыг тус бүрт нь 5 жил 10 хоногийн ял өгсөн бөгөөд мөн хоёулангаас нь 5 сая төгрөг гаргуулан улсын орлого болгохоор шүүхээс шийдвэрлэж байжээ.

22.    Өчигдөр Г.Буяндоржийн гэрийнх нь хаалган дээр ШШГЕГ-аас зарлан дуудах хуудас наасан тухай мэдээлэл зурагтайгаа нийтлэгджээ.

23.   Зарим хэвлэлд түүнийг хятадуудтай нийлэн Дарханы төмөрлөгийн үйлдвэрийн дансан дахь мөнгийг угаасан байж болзошгүй гэж дурджээ.

24.     Харин Г.Буяндорж Амарбаясгалант хийдийн Бумбаны баярт оролцож явах үед ийм хэрэг болсныг мэдсэн гэж тайлбарлаж байгаа. Ирсэн даруйдаа үүсээд байгаа нөхцөл байдлын талаар тайлбар хийнэ гэж байсан ч одоогоор таг чиг байна.