АН-ын 4-11 уулзалт өнөөдөр “ТЭЦ II” цахилгаан станцад боллоо. Уулзалтаар агаарын бохирдол болон ТЭЦ-2-ыг түшиглэн баригдсан ч ашиглалтанд ороогүй байгаа коксжсон түлшний үйлдвэрийн асуудлыг хөндөж, нөхцөл байдалтай газар дээр нь танилцсан юм.  Энэ удаагийн уулзалтад БОНХ-ийн сайд С.Оюун, Уул уурхайн яамны Түлшний бодлогын хэлтсийн дарга А.Эрдэнэпүрэв, АН-ын Ерөнхий нарийн бичгийн дарга Ц.Оюундарь болон ТЭЦ-II дулааны цахилгаан станцын удирдлагууд оролцлоо.

 Утааг бууруулахын тулд сайжруулсан зуух, боловсруулсан түлш гэх мэт  олон арга хэмжээг авч хэрэгжүүлж байгаа юм. Түүний нэг нь “ТЭЦ-II”-ыг түшиглэсэн утаагүй түлшний үйлдвэр. “Аморе интернэшнл” компани нь “ТЭЦ-II”-ыг түшиглэн утаагүй түлшний үйлдвэр байгуулахаар 2010 он Засгийн газартай гэрээ байгуулан ажиллаж эхэлсэн. Гэрээний дагуу түлш боловсруулах үйлдвэр  2012 онд ашиглалтад оруулахаар байсан ч тодорхой шалтгааны улмаас одоо болтол ашиглалтад оруулаагүй байгаа юм. Одоогийн байдлаар тэдэнд улсын төсвөөс 16,8 тэрбум өгсөн байгаа аж.

Үйлдвэрийн ажил хойшилсон талаар тус компанийн захирал Бямбаахүү ярихдаа ““ТЭЦ-II түшиглэн 210 мянган тонн хагас кокосжсон түлш үйлдвэрлэх хүчин чадалтай цогцолбор байгуулах ажлыг 2010 оноос эхлүүлсэн. Бид нийт дөрвөн чиглэлээр цогцолборыг барьж байгуулах байсан юм. Тодруулбал, дулаан дамжуулах зуух, коксжсон түлш нийлүүлэх үйлдвэр, бүтээгдэхүүн хадгалах агуулах гэсэн чиглэлээр барих байсан. Гэвч дулаан дамжуулах зуухны нэг нь ашиглалтад орох боломжгүйгээгээс цогцолборын ажил зогсоод байна. Үйлдвэрийн хувьд ажил дууссан ч барих ёстой хоёр зуухны нэгийг нь бариагүй учраас энэ асуудал гацахад хүрсэн. Компаний зүгээс зохиох хариуцлагаа бид өөрсдөө хүлээнэ” гэсэн тайлбарийг хэллээ. Харин Уул уурхайн яамны Түлшний бодлогын хэлтсийн дарга А.Эрдэнэпүрэв хэлэхдээ “Нэгэнт зуухны асуудлаа шийдвэрлэж чадахгүй байгаа учраас бид энэ сардаа багтааж, боловсруулсан түлшийг үйлдвэрүүдээс авч коксжсон түлшийг нийлүүлэхээр төлөвлөж байгаа юм. Энэ сардаа багтаан 5500 тонн орчимыг нийслэлийн иргэдэд тараах төлөвлөөд ажиллаж байна” гэлээ. Хагас  коксжсон түлшийг тонн тутмыг 170 мянган төгрөгөөр борлуулахаар төлөвлөөд байгаа аж.

 Тэд хоёр жилийн өмнө тендерт шалгарсаны дараа “Бид жилд 210 мянган тонн хагас коксжсон шахмал түлш нийлүүлэх хүчин чадалтай цогцолбор байгуулна. Энэ байдлаараа гэхэд 2011 оны сүүлээр түлшээ нөөцлөөд эхэлнэ” гэж ам өгчээ. Гэвч дулаан дамжуулах хэсэг нь ажилд орохгүй байгаа учраас коксжих нүүрс боловсруулж буй үйлдвэрээ урьдчилаад Засгийн газарт хүлээлгэж өгөхийг хүсч байгаа аж. Тиймээс гэрээний заалтын дагуу эхлээд утаагүй түлшний үйлдвэрээ хүлээлгэж өгөхөөр болсон байна. Харин үүний дараа дулаан дамжуулах хэсгээ өгөх аж. “Аморе интернэшнл” компанийн хувьд үйлдвэрийг хүлээлгэн өгөх бөгөөд цааш хэрхэн, яаж ажиллуулах нь тодорхойгүй байгаа юм байна. Одоо тус үйлдвэрт улсын комиссын техникийн үзлэг орсон бөгөөд хүлээж авбал энэ сардаа коксжих нүүрсээ түгээх юм байна. Цэвэр агаарын сан нь 2011, 2012, 2013 онд улсын төсвөөс нийт 92,5 тэрбум төгрөг төсөвлөж байснаас 2013 оны аравдугаар сарын 1-ний байдлаар нийт 67  тэрбум төгрөгийг зарцуулсан байна.