АНУ-ын Зэвсэгт хүчний цэргийн сүүлчийн цуваа өчигдөр Иракаас гарав. Уг цуваанд Техас мужид байрладаг Форт Хүүд цэргийн баазын 500 албан хаагч, 110 нэгж цэргийн техник байжээ. Ингэснээр Саддам Хусэйний дэглэм унаснаас хойш тус улсад есөн жил байсан АНУ-ын цэрэг бүрэн гарч дууслаа. Одоо Иракт АНУ-ын ЭСЯ-ны дэргэд 157, дипломат төлөөлөгчийн газруудыг хамгаалах цөөхөн америк цэрэг үлджээ.
   Есөн жилийн хугацаанд Иракт Америкийн 1.5 сая цэрэг офицер алба хаасан бөгөөд тэдний 4484 нь амь үрэгдэж, 30 мянган нь шархадсан юм. Харин энгийн номхон 60 мянган хүн нас барсан гэж Пентагон мэдээлдэг. Иракийн кампанид АНУ нэг их наяд доллар зарцуулжээ.       
   АНУ, Их Британи улсууд Саддам Хусэйний дэглэмийг үй олноор устгах зэвсэг бүтээн хадгалж байна хэмээн буруутгаж 2003 оны гуравдугаар сард НҮБ болон бусад байгууллагын аливаа нэг тогтоолгүйгээр Иракт довтолсон юм. Хуурай замын цэрэг нь гурван долоо хоногийн дараа Багдадад орсон бөгөөд С.Хусэйний дэглэмийг унасны дараа, үй олноор устгах зэвсэг Иракт байгаагүй нь тодорхой болсон юм.