Сонгуулийн хууль, тогтолцоонд багагүй өөрчлөлт орж байгаатай холбоотойгоор үндсэн хуулинд нэмэлт өөрчлөлт оруулах цөөнгүй саналыг УИХ-ын гишүүд гаргасан. Засгийн газрын гишүүн нь УИХ-ын гишүүдийн гуравны нэгээс хэтрэхгүй байх мөн сум, хороо, багийн засаг дарга нарын суудалд харьяат иргэн хэн ч байсан өөрийн нэрийг дэвшүүлж болно гэсэн заалтуудыг оруулахаар боллоо. Өнөөдөр хэрэгжиж байгаа хуулиар бол багийн засаг даргыг сумын засаг дарга, сумын засаг даргыг аймгийн засаг дарга томилж байгаа. Энэ заалтыг оруулснаар доод шатандаа нам, эвсэл гэж хоорондоо талцаж, ажил цалгардуулдаг байдал багасна гэж үзжээ. Мөн 2012 оны орон нутгийн сонгуулийг УИХ-ын сонгуультай нэг өдөр хийхээр шинээр баталсан хуулинд заасан байгаа юм.

  АН дээрх саналуудыг бүрэн дэмжиж байгаа бол МАН сүүлийн заалтыг дахин нягтлах санал гаргасан. Гэсэн ч хоёр нам удаан яригдаж байгаа энэ заалтуудыг хуулийн хугацаанд нь багтааж Үндсэн хуульд оруулахын тулд энэ долоо хоногт багтааж УИХ-ын чуулганд оруулах төлөвтэй байна. Орон даяар сонгууль болох өдрөөс зургаан сарын өмнөх хугацаанд Үндсэн хуульд гар хүрэхийг хориглосон хуультай байдаг. УИХ-ын гишүүн Ө.Энхтүвшин: “Энэ сарын 27 хүртэл баталж амжихгүй бол дараагийн парламент энэ заалтуудыг өөрчлөх байх. Өмнө нь Үндсэн хуулийн цэцээс Засгийн газрын гишүүдийн гуравны нэг нь УИХ-ын гишүүн байж болно гэсэн хязгаарлалтыг хийх саналыг ч гаргаж байсан. Одоо бараг Засгийн газрын гишүүд нь зуун хувь УИХ-д сууж байгаа” гэв.