Монголчуудын хувьд цахим ертөнц өдөр тутмын хэрэглээ болсон гэхэд хэлсдэхгүй болжээ. Энэ нь  нэг талаараа хөгжлийг хурдасгаж байгаа зэрэг  сайн талтай ч нөгөө талаараа олон сөрөг зүйлийг бий болгоод байгаа нь нууц биш.

Өөрөөр хэлбэл цахим ертөнц дахь гэмт хэргийн тоо сүүлийн жилүүдэд манай улсад төдийгүй дэлхий дахинд нэмэгдэх болсоныг хууль хяналтынхан дуу нэгтэйгээр хэлж байгаа юм.  Интернетийн ертөнцөд үйлдэгддэг гэмт хэрэг дотроо олон янз.  Тодруулбал, хүний наймаа, санхүүгийн луйвар, охид бүсгүйчүүд, бага насны хүүхдийг садар самуунд уруу татах, бэлгийн мөлжлөгт оруулах зэрэг гэмт хэргүүд ихээр үйлдэгддэг.

Саяхан манай улсад АНУ-ын холбооны мөрдөх товчооныхон “Ор сураггүй алга болсон, мөлжлөгөд өртсөн хүүхдийн төлөө” олон улсын төвтэй хамтран цахим ертөнцөд үйлдэгдэж буй гэмт хэргийн талаар уулзалт, зөвлөгөөнийг зохион байгуулсан байгаа.  Тэгвэл энэ үеэр  “Ор сураггүй алга болсон, мөлжлөгөд өртсөн хүүхдийн төлөө” олон улсын төвийн  Сургалт технологийн газрын захирал Гильермо Абигейл хэлэхдээ “Ази тивд хүн бүр өөрийн мобайл харилцаа холбооны төхөөрөмжтэй байдаг. Эдгээр төхөөрөмж дотор нь цахим ертөнцөд нэвтрэх боломжтой программууд суурилсан. Энэ нь гэмт хэрэгтнүүдэд хэрэгтэй материалууд, түүнийгээ тараах, татаж авах, бусадтай арилжих, наймаалцах боломжийг олгодог. Тэр дундаа хүүхдийг оролцуулсан садар самууныг сурталчлах, бэлгийн хүчирхийлэлд автуулахтай холбоотой гэмт хэргүүд зохион байгуулалттай гэмт хэргийн дунд дээрээсээ гуравт орж байна.  Цахим орчин гэмт этгээдэд нэр усгүй, зураг дүрсгүй байх боломжоор хангаад өгчихөж байна.  Одоо хохирсон хүүхдүүдээс хамгийн бага нь гурван настай хүүхэд бий. Гуравхан настай хүүхдийг ой санаанд  оромгүй хэлбэрээр хүчирхийлж байгаа дүрс бичлэгийг интернетэд байрлуулсан байдаг” гэв.

Ер нь ажиглаад байхад  өсвөр насныхан олон нийтийн сүлжээнд дор хаяж гурван хуудастай байдаг. Өөрөөр хэлбэл фэйсбүүк, яахуу, блог хөтөлдөг гэх мэт.  Гэвч эцэг, эхчүүд энэ тухай юу ч мэддэггүй. Мөн хүүхдүүд төдийгүй иргэд цахим ертөнцөд дуртай бүхнээ постолж тавьдаг. Тэгвэл  цагдаагийн байгууллагаас  интернет ашиглагчдыг өөрийн хувийн мэдээллийг битгий хамаагүй олон нийтэд дэлгэ гэдгийг дахин дахин сануулсаар байгаа.  Түүнчлэн, өөрийн найз нар гэсэн хуудсыг байн байн орж харж, шалгаж бай. Та бодит амьдрал дээр аравхан хүнтэй идэвхтэй харилцдаг хэрнээ найз нарын жагсаалт 2000 давчихсан байх хэрэгтэй юу гэдгээ бодох хэрэгтэй юм. Эцэг эхчүүд ч гэсэн таны охины интернэт дахь 13 настай найз хөвгүүн  гаж донтонгууд байж мэднэ гэж дор бүрнээ анхааралтай байх хэрэгтэй. Учир нь тэд ямар ч хэлбрээр өөрсдийн дүрийг интернэтэд өөрчилж далдалж чаддаг.