Такси дуудлагын үйлчилгээг хянан зохицуулах журмыг ШӨХТГ-аас боловсруулж УИХ-д өргөн барихаар олон нийтээс санал асуулга авч байгаа аж. Энэхүү журам хэрэв батлагдав ирэх сарын 1-ний өдрөөс эхлэн дагаж мөрдөх боломжтой юм байна.

Нэг. Нийтлэг үндэслэл

1.1 Такси дуудлагын үйлчилгээ, такси үйлчилгээ эрхэлж буй аж ахуйн нэгж, байгууллага, иргэдийн үйл ажиллагаа, хүлээх үүрэг хариуцлагыг тодорхойлж, түүнийг хэрэгжүүлэх, төрийн захиргааны эрх бүхий байгууллагаас зохицуулалт хийж, хяналт тавин такси дуудлагын үйлчилгээг соёлтой, осол зөрчилгүйгээр хэрэглэгчдийн эрх ашигт нийцүүлэн хүргэхэд оршино.

1.2 Энэхүү журмыг Монгол Улсын хэмжээнд такси дуудлагын үйлчилгээний чиглэлээр үйл ажиллагаа явуулж байгаа аж ахуйн нэгж, байгууллага, иргэд дагаж мөрдөнө.

1.3 Такси дуудлагын үйлчилгээний нийтлэг журам нь Монгол улсын үндсэн хууль, Иргэний хууль, Автотээврийн тухай хууль, Хэрэглэгчийн эрхийг хамгаалах тухай хуулиуд болон бусад холбогдох хууль тогтоомжийн хэм хэмжээгээр зохицуулагдана.

Хоёр. Дуудлагын үйлчилгээнд баримтлах зарчим
2.1 Такси дуудлагын үйлчилгээнд дараах зарчмыг баримтлана.

2.1.1 Түргэн шуурхай, хэрэглэгчийн аюулгүй байдал, чанар стандартыг хангасан үйлчилгээ үзүүлэх

2.1.2 Үйлчилгээний талаар хэрэглэгчийн санал хүсэлтийг хүлээн авч ирүүлсэн гомдол, зөрчлийг арилгах, хэрэглэгчид учруулсан хохиролыг барагдуулж зөрчигдсөн эрхийг сэргээдэг байх.

Гурав. Такси дуудлагын үйлчилгээнд төрийн байгууллагын оролцоо

3.1 Тээврийн асуудал эрхэлсэн төрийн байгууллагын оролцоо

3.1.1 Такси дуудлагын үйлчилгээ эрхлэх аж ахуйн нэгж байгууллагатай хамтран ажиллах гэрээ байгуулан, бүртгэж, зөвшөөрөл олгоно.

3.1.2 Дуудлагын төв, тээвэрлэгчийн үйл ажиллагаа, тээврийн хэрэгсэлд хяналт тавьж жилд нэг удаа гэрээг дүгнэн сунгах эсэхийг шийдвэрлэнэ. Гэрээг дүгнэхдээ дуудлагын төвийн үйл ажиллагаа, тээврийн хэрэгслийн байдалд хяналт шалгалт адестатчилалыг Хэрэглэгчийн эрхийг хамгаалах төрийн байгууллагатай хамтран хийж шийдвэрлэнэ.

3.2 Хэрэглэгчийн эрхийг хамгаалах төрийн захиргааны байгууллагын оролцоо

3.2.1 Такси дуудлагын үйлчилгээний журмыг боловсруулан, хэрэгжилтэнд нийтийн тээврийн асуудал эрхэлсэн төрийн байгууллагатай хамтран хяналт тавина.

3.2.2 Такси дуудлагын төвийн үйлчилгээ холбогдох хууль, журмын дагуу явагдаж байгаа эсэх, хэрэглэгчийн санал гомдлыг шийдвэрлэж буй байдал зэрэгт хяналт шалгалт хийж холбогдох арга хэмжээг авч гэрээг сунгах эсэхэд санал өгнө.

3.3 Хэрэглэгчийн санал хүсэлтийг хүлээн авч шийдвэрлэн, зөрчил гаргасан аж ахуйн нэгж байгууллагад хуулийн дагуу хариуцлага тооцно.

3.4 Гэрээг дүгнэхдээ үйлчилгээний чанар, амжилттай дуудлагын хувь үзүүлэлт, хэрэглэгчийн санал гомдлыг шийдвэрлэсэн байдал зэрэг дээр үндэслэнэ.

Дөрөв. Такси дуудлагын үйлчилгээ эрхлэгчид тавигдах ерөнхий шаардлага

4.1 “Дуудлагын үйлчилгээ” эрхлэгч нь дараах шаардлагыг хангасан байна.

4.1.1 Хуулийн этгээдийн эрхтэй аж ахуйн нэгж байх

4.1.2 Дуудлагын үйлчилгээ хүлээн авах тусгай зөвшөөрөл бүхий тусгай дугаартай байх.

4.1.3 Дуудлага үйлчилгээнд зориулагдсан тусгай программ хангамжтай байх бөгөөд уг программ нь хэрэглэгчийн дуудлагыг хамгийн багадаа 6 сараар архивлан хадгалах хүчин чадалтай байна.

4.1.4 Хэрэглэгчээс 24 цагийн турш утсаар болон интернетээр дуудлага хүлээн авч үйлчилгээ үзүүлэх боловсон хүчинтэй байх.

4.1.5 Хэрэглэгчийн гомдлыг хүлээн авч шийдвэрлэхээс гадна шаардлагатай тохиолдолд газар дээр нь очиж шийдвэрлэдэг хяналтын албатай байна.

Тав. Такси дуудлагын үйлчилгээ эрхлэгчийн үүрэг, хариуцлага

5.1 Дуудлагын үйлчилгээ эрхлэгч нь MNS 5122:2013 стандартын шаардлага хангасан үйлчилгээг үзүүлж энэхүү журмыг үйл ажиллагаандаа чанд мөрдөн ажиллана.

5.2 Дуудлагын үйлчилгээг бие даасан такси компани эрхлэхээс гадна тусгай дугаар эзэмшигч аж ахуйн нэгж байгууллага нь MNS 5122:2013 стандартын 5-т заасан шаардлага хангасан тээвэрлэгчтэй хамтран үйл ажиллагаа эрхэлж болно.

5.3 Дуудлагын үйлчилгээ эрхлэгч нь шаардлага хангасан тээврийн хэрэгсэлтэй хувь хүнтэй хамтран ажиллаж болно. Энэ тохиолдолд MNS 5122:2013 стандартын 5.4-т заасан тоног төхөөрөмжөөр хангаж, тээврийн хэрэгсэлд суурилуулж өгнө.

5.4 Дуудлагын төв нь дотооддоо холбогдох хууль тогтоомж, дүрэм журамд нийцүүлэн үйлчилгээний журам боловсруулан мөрдөж ажиллана.

5.5 Дуудлагын төв нь үйлчилгээ үзүүлэгч жолооч нартай гэрээ байгуулан ажиллах бөгөөд үйлчилгээг хүртээмжтэй болгох үүднээс жолоочийн өдөрт заавал хүлээн авах дуудлагын тоог зааж тусгасан байна.

5.6 Дуудлагын төв нь хэрэглэгчийн дуудлагыг түргэн шуурхай хүлээн авч хаяг байршил шаардлагатай мэдээллийг тодруулж тэмдэглэж авна. Дуудлага авсан даруйд жолоочтой холбогдон 5 минутад багтаан хэрэглэгчид таксиний дугаар, очих хугацааг нарийн мэдэгдэнэ.

5.7 Дуудлага хүлээн авах сул такси байхгүй тохиолдолд хэрэглэгчид боломжгүй талаар мэдэгдэн, захиалгыг хэрхэн шийдвэрлэхээ тохиролцоно.

5.8 Хамтран ажиллаж буй такси үйлчилгээ эрхлэгч компанийн ажилтан, үйлчилгээ үзүүлэгч жолооч нарт хагас жил тутамд үйлчилгээний соёл, стандартын шаардлага, хөдөлгөөнт мэдээллийн хяналт зэрэг сургалт зохион байгуулж сургалтын тайланг ШӨХТГ, НТГ-дад ирүүлнэ.

5.9 Үйлчилгээний чанарын хяналт шалгалт, хэрэглэгчийн гомдол шийдвэрлэлтийн тусгай хэлтэс ажилуулж хяналт шалгалтыг тогтмол явуулж үйлчилгээний чанарт анхаарч ажиллана.

5.10 Үйлчилгээ үзүүлж буй такси нь MNS 5122:2013 стандартын 4.1.4-т заасан таксометртэй байж хэрэглэгчид төлбөрийн баримт өгнө.

5.11 Дуудлагын үйлчилгээ эрхлэгч нь MNS 5122:2013 стандартын 5.6-т заасан хүүхэд болон хөгжлийн бэрхшээлтэй иргэдэд үйлчилэх тусгай зориулалтын такситай байх бөгөөд эдгээр таксиний жолооч нарт хэрхэн үйлчилгээ үзүүлэх талаар тусгайлан сургалтыг зохион байгуулсан байна.

5.12 Дуудлагын төв нь хөгжлийн бэрхшээлтэй иргэдийн дуудлагыг хүлээн авч үйлчилгээг заавал үзүүлнэ.

5.13 Хөгжлийн бэрхшээлтэй иргэд, жирэмсэн, нялх хүүхэдтэй эхчүүд, бага насны хүүхэд, өндөр настан зэрэг хүмүүсийг таксинд сууж, буухад жолооч анхаарал тавьж туслах үүрэгтэй.

Зургаа. Зөрчлийг хянан шийдвэрлэх

6.1 Дуудлагын төв нь үйлчилгээ үзүүлэгч жолооч нартай гэрээ байгуулан ажиллах бөгөөд зөрчил гарган үүргээ биелүүлээгүй жолоочид гэрээний дагуу хариуцлага тооцох эрхтэй.

6.2 Дуудлагын төв нь хэрэглэгчийн гомдлыг хүлээн авч 72 цагийн дотор шийдвэрлэж хариу өгнө. Шаардлагатай тохиолдолд дуудлагын төвийн хяналтын алба нь газар дээр нь очиж зөрчлийг шалгаж шийдвэрлэнэ.

6.3 Дуудлагын төвийн үйл ажиллагаатай холбоотой гомдлыг нийтийн тээврийн асуудал эрхэлсэн болон хэрэглэгчийн эрхийг хамгаалах төрийн захиргааны байгууллага хүлээн авч хуулийн дагуу шийдвэрлэнэ.

6.4 Жолооч нь дуудлагын төвөөс дуудлагыг хүлээн авсан ч товлосон цагт тухайн газар очоогүй эсвэл цагтаа үйлчлүүлэгчийг аваагүй тохиолдолд гэрээний дагуу дуудлагын төв хариуцлага тооцож хэрэглэгчийн хохиролыг барагдуулна.

6.5 Хэрэглэгч зөрчил гарган товлосон хугацаанд гарч ирээгүй тохиолдолд жолооч нь 10 минут хүлээгээд 10 минут өнгөрсөн тохиолдолд дуудлагын төвд мэдэгдэн асуудлыг шийдвэрлэнэ.

6.6 Хоёр болон түүнээс дээш худал дуудлага өгөн зөрчил гаргасан үйлчлүүлэгчийн дуудлагыг 1 жилийн дотор хүлээн авахгүй.

Долоо. Журам зөрчигчдөд хүлээлгэх хариуцлага
7.1 Энэхүү журмыг зөрчсөн иргэн, аж ахуйн нэгж, байгууллагад холбогдох хууль тогтоомжийн дагуу эрх бүхий албан тушаалтан хариуцлага хүлээлгэнэ