Дүүргийн Эрүүгийн хэргийн анхан шатны нэгдүгээр шүүх татварын гэх тодотголтой Ч.Гансүх нарын 13 хүнд холбогдох эрүүгийн хэргийг энэ сарын 17-21-ний өдрүүдэд ШШГЕГ-ын харъяа Цагдан хорих 461 дүгээр ангийн шүүх хуралдааны танхимд нээлттэйгээр хянан хэлэлцлээ.

Шүүхээс шүүгдэгч Б.Буяннэмэхэд Эрүүгийн хуулийн 272 дугаар зүйлийн 272.2,  Х.Хандсүрэн, Б.Жаргалсайхан нарт Эрүүгийн хуулийн 265 дугаар зүйлийн 265.2,  Эрүүгийн хуулийн 150 дугаар зүйлийн 150.3-т зааснаар яллах дүгнэлт үйлдэж ирүүлсэн гэмт хэргүүдийг гэмт хэргийн бүрэлдэхүүнгүй гэж үзэн хэрэгсэхгүй болгож, Б.Буяннэмэх, Х.Хандсүрэн, Б.Жаргалсайхан нарыг цагаатгажээ.

Татварын Ерөнхий Газрын Хяналт шалгалт арга зүйн хэлтсийн даргаар ажиллаж байсан шүүгдэгч Ч.Гансүхийн холбогдсон албан тушаалтан албан үүрэгтээ хайнга хандсаны улмаас хүнд хор уршиг учирсан гэж Эрүүгийн хуулийн 272 дугаар зүйлийн 272.2 дахь хэсэгт зааснаар яллах дүгнэлт үйлдэж ирүүлсэн гэмт хэргийг гэмт хэргийн бүрэлдэхүүнгүй гэж үзэж, хэрэгсэхгүй болгосон байна. Харин шүүгдэгч Ч.Гансүхийг хээл хахууль авахыг завдсан, хууль ёсны орлогоосоо гадна онц их хэмжээгээр эд хөрөнгө, орлого олсон, төрийн албан тушаалтан албаны эрх мэдэл буюу албан тушаалын байдлаа урвуулан ашигласан гэмт хэргийг зохион байгуулсны улмаас хүнд хор уршиг учирсан гэмт хэргүүдийг үйлдсэн гэм буруутайд тооцож, 100 сая төгрөгийн эд хөрөнгө хурааж, татварын улсын байцаагч хийх эрхийг 8 жилийн хугацаагаар хасч, 8 жил чанга дэглэмтэй эрэгтэйчүүдийн хорих ангид хорих ял оногдуулжээ. Түүнчлэн хууль бусаар олсон 2 тэрбум 845.309.193 төгрөгийг хурааж, төрийн өмчлөлд шилжүүлэхээр шийдвэрлэсэн байна.    

Баянгол дүүргийн Татварын  хэлтсийн даргаар ажиллаж байсан шүүгдэгч Д.Энхбатыг хууль ёсны орлогоосоо гадна онц их хэмжээгээр эд хөрөнгө, орлого олсон,  төрийн албан тушаалтан албаны эрх мэдэл буюу албан тушаалын байдлаа урвуулан ашигласан гэмт хэргийг зохион байгуулсны улмаас хүнд хор уршиг учирсан, онц их хэмжээний татвар төлөхөөс зайлсхийсэн гэмт хэргүүдийг үйлдсэн гэм буруутайд тооцож, 50 сая төгрөгийн эд хөрөнгө хурааж, татварын улсын байцаагч хийх эрхийг 8 жилийн хугацаагаар хасч, 8 жил чанга дэглэмтэй эрэгтэйчүүдийн хорих ангид хорих ял оногдуулжээ. Мөн хууль бусаар олсон 592 сая 835.500 төгрөгийг хурааж, төрийн өмчлөлд шилжүүлэхээр, 50 сая 41.300 төгрөгийг гаргуулж Татварын Ерөнхий газарт олгуулахаар шийдвэрлэсэн байна.

Шүүх шинжилгээний Үндэсний Хүрээлэнгийн Эдийн засгийн шинжилгээний хэлтсийн даргаар ажиллаж байсан шүүгдэгч Б.Жаргалыг хууль ёсны орлогоосоо гадна онц их хэмжээгээр эд хөрөнгө, орлого олсон, зориудаар худал дүгнэлт гаргасны улмаас хүнд хор уршиг учирсан гэмт хэргүүдийг үйлдсэн гэм буруутайд тооцож, шинжээч хийх эрхийг 5 жил 6 сарын хугацаагаар хасаж, 36 сая 504 000 төгрөгөөр торгох ял оногдуулжээ. Түүнчлэн хууль бусаар олсон 86 сая 500 000 төгрөгийг төрийн өмчлөлд шилжүүлэхээр шийдвэрлэсэн аж.  

Шүүгдэгч Ч.Даваасүрэнгийн холбогдсон бусдын эд хөрөнгийг завшсаны улмаас бусдад онц их хэмжээний хохирол учирсан гэж Эрүүгийн хуулийн 150 дугаар зүйлийн 150.3 дахь хэсэгт зааснаар яллах дүгнэлт үйлдэж ирүүлсэн хэргийг гэмт хэргийн бүрэлдэхүүнгүй гэж үзэж, хэрэгсэхгүй болгожээ. Харин Ч.Даваасүрэнг төрийн албан тушаалтан албаны эрх мэдэл буюу албан тушаалын байдлаа урвуулан ашиглаж хүнд хор уршиг учруулсан гэмт хэрэгт хамжигчаар хамтран оролцсон гэмт хэрэг үйлдсэн гэм буруутайд тооцож, аудитор хийх эрхийг 3 жилээр хасаж, 3 жил хорих ял оногдуулж, уг ялыг жирийн дэглэмтэй эрэгтэйчүүдийн хорих ангид эдлүүлэхээр шийдвэрлэсэн байна.

Татварын улсын байцаагчид болох П.Галмандах, Н.Рагчаахүү, Б.Өсөхбаяр, Н.Чинбат, Б.Жаргал, О.Бямбасүрэн нарыг төрийн албан тушаалтан албаны эрх мэдэл буюу албан тушаалын байдлаа урвуулан ашигласан гэмт хэрэгт хамтран оролцсоны улмаас хүнд хор уршиг учирсан гэмт хэрэг үйлдсэн гэм буруутайд тус тус тооцож, тус бүрийг татварын улсын байцаагч хийх эрхийг 3 жилээр хасаж, тус бүр 3 жил хорих ял оногдуулж, уг ялыг мөн хугацаагаар тэнсэж хянан харгалзжээ.

Шүүхээс иргэний хариуцагч “Кью Жи Экс Монгол” ХХК-аас 13 тэрбум 445 сая 598.900 төгрөг, “Пибоди Поло Ресорсез” ХХК-аас 1 тэрбум 219 сая 368.700 төгрөгийг тус тус гаргуулж Татварын Ерөнхий Газарт олгуулахаар шийдвэрлэсэн байна.

Дашрамд дурдахад нийт 13 шүүгдэгчид холбогдох, 55 хавтаст хэргийг хянан хэлэлцэх шүүх ажиллагаанд шүүгдэгчийн өмгөөлөгч 21, хохирогчоор Татварын ерөнхий газар,  “Эрдэнэт үйлдвэр” ХХК-иудаас тус бүр 1 төлөөлөгч, 2 иргэний хариуцагч, эдгээрээс гадна 3 гэрч, 9 шинжээч оролцжээ. Мөн шүүх хуралдаанд шүүгдэгч нарын ар гэрийнхэн болон хэвлэл мэдээллийн байгууллагын төлөөлөгчдийг нээлттэйгээр оролцуулсан байна. Гэтэл зарим хэвлэл мэдээллийн хэрэгслээр энэхүү хурал хаалттай явагдсан, хорих ял оногдуулсан зарим шүүгдэгч нарыг цагаатгасан мэтээр ташаа мэдээлэл тараасанд харамсч байгаагаа Эрүүгийн хэргийн шүүхээс онцолж байна.