Их аварга Д.Дагвадоржийг ид мандан бадарч байхад хамгийн их нөмөр нөөлөг болж явсан хүн бол Н.Энхбаяр билээ. Хувьзаяаны төөргөөр түүний мандан бадралт Н.Энхбаярыг Ерөнхий сайд, Ерөнхийлөгч байх үетэй давхацсан. Монгол Улсын хөдөлмөрийн баатрын цол тэмдэгийг тэрээр Н.Энхбаярын гараас хүртэж байв. Ийнхүү тэд тун ойрхон шадарлаж явсныг Монголын ард түмэн бүгд мэднэ. Их аварга арлын улсаас эх орондоо ирмэгцээ хамгийн түрүүнд Н.Энхбаяртай уулздаг, жил бүрийн цагаан сараар очиж золгодог байсан бол Н.Энхбаяр түүнийг улстөр, бизнесийн томчуудтай холбож Монгол дахь байр суурийг нь баталгаажуулж явсан гэдэг.
Түүгээр ч үл барам Н.Энхбаярыг “самбарын” болтол рекламдахад хамтдаа хамгийн их зургаа татуулсан хүн нь Асашёорюү байжээ. Цаашлаад Асашёорюү Н.Энхбаярын спортын асуудал эрхэлсэн зөвлөх болж, сумогоос чөлөөт цагаараа саарал ордноор үзэгдэх болсон түүх эхэлсэн билээ. Товчхондоо тэд тэнгэрт мөргөсөн ахан дүүс шиг л явжээ.
Н.Энхбаярыг баривчлагдах үед намынх нь нөхдөөс ч түрүүлж яаран сандран ирсэн хүн мөн л Асашёорюү байсан. Тэрээр 2012 оны 04-р сарын 13-ны өдөр Хонг Конгын онгоцноос эх орондоо шууд буумагцаа Н.Энхбаярын гэрийн гадаа халамцуухан ирж “Юу болоод байгаа юм бэ. Онгоцноос шууд буугаад наашаа ирлээ. Би Н.Энхбаяр Ерөнхийлөгчөө хамгаална” гэж хэлсэн нь тэдний хооронд ямар дотно, ах дүүгийн харилцаа байсны маш тод илрэл юм.
Гэсэн хэдий ч мөнхий найз гэж үгүй, мөнхий дайсан гэж үгүй мөнхий эрх ашиг л бий гэдэг шиг тэдний харилцаа өөр болжээ. Өөрт нь хамгийн их түшиг тулгуур болж явсан Н.Энхбаяраас Асашёорюү нүүр буруулсан байна. Тодруулбал Лондон-2012 зуны олимпын хүрэл медальт С.Батцэцэг МАХН-д элсэхэд түүнрүү болон тус намын дэд дарга Д.Тэрбишдагва руу их аварга утасдаж дарамталсан гэдгийг МАХН-ынхан мэдэгдээд байгаа. Эх сурвалжуудын хэлж буйгаар Д.Дагвадорж Н.Энхбаярыг дагаж МАХН-руу элсэхээр явж байсан ч түүнийг замаас нь огт өөр хүн эргүүлсэн гэдэг. Энэ хүн бол Н.Энхбаярын эртний дайсан Х.Баттулга юм.
Нэгэн цагт Н.Энхбаяртай түрийвч нэгтэй гэгдэж байсан Х.Баттулга түүнтэй Худалдаа хөгжлийн банкны хувьчлал тойрсон маргаанаас болж ихээхэн муудалцсан гэдэг. Ингэж Н.Энхбаяр Асашёрюү нарын хагарлыг Х.Баттулга тавьж түүнийг АН-д элсүүлсэн байдаг. Ийнхүү мөнхийн эрх ашгийн шалтгаанаар Н.Энхбаяраас Асашёорюү нүүр буруулж, түүний намын эсрэг үйл ажиллагааг гардан зохион байгуулах болжээ. Их аварга маань нэгэнтээ Монгол Тулгатны 100 эрхэм нэвтрүүлэгт оролцож байхдаа “Урвадаг, шарвадаг явдлыг үзэж чаддаггүй” гэж хэлж байсан. Тэгвэл энэ үйлдлээ хэрхэн дүгнэж байгаа нь олон хүнд сонирхолтой санагдаж байна. Харин Н.Энхбаяр Асашёорюүгийн энэ үйлдэлд ихэд эмзэглэж намынхаа нөхөдтэй утсаар ярьсан гэдгийг ойрын эх сурвалж мэдээллэсэн юм.
Сэтгэгдэл (60)