Анод банкны 1200 гаруй хувь­цаа эзэмшигч­дийн мөнгийг хувьдаа завшиж, бусдад их хэмжээ­ний хохирол учруулсан хэрэгт яллагдаг­ч­аар татагдсан тус банкны захирал Л.Уламбаяр, ТУЗ-ийн гишүүн Н.Даваа, Э.Гүр-Аранз, Д.Энх­төр нар гурван жилийн хугацаанд шалгуулсаны эцэст одоогоор батлан даалтад гараад байгаа. Энэ хугацаанд тэдний хэрэг хууль хяналтын байгууллагын хооронд 12 удаа шилжсэн. Харин өнгөрсөн сарын 13-нд Нийслэлийн прокурорын газраас дахин мөрдөн байцаалтад буцаад билээ. Учир нь “Анод”-ын гэх тодотголтой уг хэрэгт “Мон-Уран” компаний захирал Х.Наранхүү мөн холбогдоод байгаа аж. Тэрээр тус компаниас 17 тэрбум төгрөг авч, өөрийн эзэмшлийн байгууламжийг өрөндөө өгөхдөө 12 тэрбум төгрөг хэмээн тооцсон байна. Мөн уг хэрэгт “Стардевелопмент” компанийн захирал Э.Цэрэндаш /Э.Гүр-Аранзын төрсөн дүү/, “Шивээговь флюрит” компанийн захирал Д.Ганзориг /Д.Энхтөрийн төрсөн дүү/, “Гүн төгөл” ХХК-ийн захирал Э.Оюунгэрэл /Э.Гүр-Аранзын төрсөн дүү/ нарт эрүүгийн хэрэг үүсгэжээ. Түүнчлэн тус компанид шалгалт хийсэн атлаа үйл ажиллагаа нь доголдсоныг анзаараагүй, ажил үүрэгтээ хариуцлагагүй хандсан Монголбанкны ажилтан, хувьцаа гаргахад хууль ёсны шаардлага тавиагүй Санхүүгийн зохицуулах хорооны мэргэжилтнүүд бас шийтгүүлнэ хэмээн эх сурвалж мэдээлэв.