УИХ-ын гишүүн О.Баасанхүү бол парламентад бодолгүй ярьж, бодлогогүй хөдөлдөгөөрөө цуутай нэгэн. Ямар сайндаа л Н.Удвал сайд түүнийг “Боловсорч гүйцээгүй боргоцой” гэж нэрлэхэв дээ.

Тэгвэл тэрбээр өчигдөрхөн олон нийтийн сүлжээ сайтаар бас л бодлогогүй мэдэгдэл хийж олныг гайхашруулав. Түүнийг Есүс Христийн шашинтай гэдгийг хүмүүс мэднэ. Хэсэг хүмүүсийн хамтаар ширээ тойрон гар гараасаа атгалцан нүдээ анин залбирч зогсоо зураг нь түүнийг шашиндаа ямар их итгэдгийг харуулдаг.

Гэхдээ Христийн шашинтай байна гэдэг нь өөр бусад шашныг илтэд ялгаварлан гадуурх гэсэн нэр биш. Учир нь өчигдөр тэрбээр “Би Есүст итгэдэг. Харин Мүүний шашин бол гаж урсгал учраас даруй хаах ёстой” хэмээн олон нийтэд мэдэгдэв.

Хэн юундаа итгээд, юу ярьж явах нь эрх чөлөө боловч хууль боловсруулагч УИХ-ын гишүүний хувьд орчин тойрон, олон нийтийг эмзэглүүлэхээр зүйлд болгоомжлонгуй хандах ёстой билээ. Учир нь манай улс үндсэн хуулиндаа хүний шашин шүтэх эс шүтэх эрхийг чөлөөтэй хуульчилж өгсөн байдаг. Тиймээс энэ олон шашны урсгалаас хүмүүс алиныг нь сонгоод  явах нь ёстой өөрийнх л мэдэх эрх.

Мэдээж Монголд Мүүнийг эсэргүүцдэг маш олон хүн байдаг ч бас бага биш тооны хүмүүс тус шашинд итгэдэг гэсэн албан бус тоо байна. Түүний дунд О.Баасанхүү гишүүний тойрогт амьдардаг хүмүүс ч байж магад. Сүүлийн үед хүн бүр Мүүний шашины талаар өөр, өөрийн байр суурийг илэрхийлж байгаа. Гэхдээ энэ нь Мүүнд итгэгчдийг хүн биш мэтээр шууд хүлээж ав гэсэн үг бас биш юм. Хэрвээ тэгвэл энэ нь өөрөө хүний эрхэнд халдаж буй асуудал. Тэгэхээр ардчилсан нийгэмтэй, хүний эрхийг дээдэлдэг манай оронд ард түмнээ шүтдэг шашинаар гадуурхах явдал бол бүр байж боломгүй зүйл гэсэн үг. Тэр дундаа хуулийг чанд мөрдөх ёстой УИХ гишүүн нь үүнд бүр оролцож боломгүй санагдана. Дэлхийн улс орнууд тэр дундаа парламентын гишүүн нь иргэдийнхээ шашин шүтэх асуудалд маш эмзэг ханддаг ба энэ талаар ярих хэрэг гарвал маш тодорхой бодлогын түвшинд ажилладаг аж. Учир нь шашины зөрчилдөөн хурцадвал цусгүй дайн хүртэл дэгдэх магадлалтай байдаг тул хоёр шашны дунд "яс хаях" буюу эвдэрэлцүүлэх зүйлийг бол бүр ярьдаггүй байна. Хэрвээ  үнэхээр Христ, Мүүн, Шарын шашин гэж хуваагдах дээрээ тулбал шашныг нь биш хүнээ бодох нь бидэнд номер нэг асуудал юм.