Монгол Улсын хэмжээнд жилд дунджаар 2500 гаруй удаагийн аюулт үзэгдэл, техникийн холбогдолтой ослын дуудлага ирдгийн 50 гаруй хувь нь зөвхөн нийслэл хотод гардаг байна.
Нийслэлийн хүн амыг гамшгаас хамгаалах, урьдчилан сэргийлэх, амгалан тайван амьдрах нөхцөлийг бүрдүүлэхэд НОБГ-ын алба хаагчдийн хүчин чармайлт их. Өнөөдөр тус газрынхан 2011 онд дэвшүүлсэн зорилтын хүрээнд хийж бүтээсэн ажлаа дүгнэж, гавьяа байгуулсан алба хаагчдаа шагнаж урамшууллаа.
2011 онд НОБГ-аас 117 ажлыг хэрэгжүүлэхээр төлөвлөснөөс 115 ажлыг хийж, биелэлт 91,19 хувьтай гарчээ. Энэ онд тус газар нь алба хаагчдынхаа гамшгаас хамгаалах үйл ажиллагаанд ард иргэд, аж ахуйн нэгжийн оролцоог өргөжүүлэх, албан хаагчдын мэргэжлийн ур чадварыг дээшлүүлж, өөрийгөө хөгжүүлэх нөхцөлийг бүрдүүлэх, бие бүрэлдэхүүний ажиллах, амьдрах нөхцөлийг сайжруулах чиглэлээр олон ажлыг хийжээ. Тухайлбал, алба хаагчдынхаа амьдрах нөхцөлийг сайжруулах зорилгоор Баянгол дүүргийн Онцгой байдлын хэлтсийн Аврах, гал унтраах 18 дугаар ангийн хашаанд 70 айлын орон сууц барихаар барилгын зураг, төсвийг мэргэжлийн байгууллагуудаар хянуулж, батлуулжээ. Мөн 70 гаруй албан хаагчдад 210 гаруй сая төгрөгийн цалингийн зээл олгож, хууль тогтоомжинд заасны дагуу 260 албан хаагчдад 5,0 сая төгрөгийн тэтгэмж, 2 гэр, 30 өрхөд утаагүй зуухыг үнэ төлбөргүй олгуулах ажлуудыг зохион байгуулсан байна. Гамшгийн аюулаас хамгаалах, урьдчилан сэргийлэх, аврах, хор уршгийг бууруулах чиглэлээр ДЭМБ, НҮБ, БНСУ, БНХАУ-тай хамтын ажиллагаагаа өргөжүүлжээ. 2011 онд амжилт гаргасан нийт 30 алба хаагчдад газрын дарга комиссар Х.Батбилэг болон зөвлөлийн гишүүд шагнал гардууллаа.
Аюулт үзэгдэл, техникийн холбогдолтой ослын нэгдсэн мэдээлэл
Нийслэлийн хэмжээнд 2011 онд аюулт үзэгдэл, техникийн холбогдолтой ослын нийт 2222 дуудлага ирсний 84,8 хувь нь объектын болон ой хээрийн түймрийн, үлдсэн 15,2 хувь нь техникийн холбогдолтой ослын дуудлага эзэлж байна. Дуудлагын дагуу нийслэлийн Онцгой байдлын газрын бие бүрэлдэхүүн үүрэг гүйцэтгэж, 770 хүний амь насыг аварч, 230 хүнд эмнэлгийн анхан шатны тусламж үзүүлсэн байна.
Гал түймрийн тоон үзүүлэлт:
2011 онд объектын гал түймрийн 1873, ой хээрийн түймрийн 11 удаагийн, нийт 1884 дуудлага бүртгэгджээ. Гал түймрийн аюулаас иргэд, төр, аж ахуйн нэгж байгууллагын нийт 13,2 тэрбум төгрөгийн өмч хөрөнгө, 299 барилга байгууламжийг аварсан бол гал түймрийн аюулд 1,4 тэрбум төгрөгийн өмч хөрөнгө өртжээ. Аврагчид галын аюулаас 451 хүний амь насыг аварсан бол гал түймэрт 37 хүн нас барж, 39 хүн түлэгджээ. Дуудлагын дагуу Аврах, гал унтраах ангиуд 1939 удаа гарч, 1288 удаагийн гал түймэр дээр унтраах үйл ажиллагааны тархалт хийж 567 цаг 10 минут ажиллаж, 3100 гаруй тн ус, 32500 гаруй литр шатахуун зарцуулан гарсан гал түймрийг байгаа хэмжээнд нь тактикийн алдаа, техникийн сааталгүй унтраалаа.
Аюулт үзэгдэл, техникийн холбогдолтой ослын мэдээлэл:
НОБГ-т он гарснаас хойш аюулт үзэгдэл, техникийн холбогдолтой ослын нийт 338 удаагийн дуудлага ирснээс хамгийн их нь зам тээврийн осол, ахуйн осол, усны осол эзэлсэн байна. Өнгөрсөн хугацаанд аврагчид гамшгийн голомтоос 319 хүнийг аварч, 164 хүнд эмнэлгийн анхан шатны тусламж үзүүлэн 66 хүнийг эмнэлгийн байгууллагад хүргэж өгчээ.
Б.Чимэг
