Энэ үгийг Европын сэргээн босголт хөгжлийн банкны Төв Азийн газрын захирал ноён Дикамп Монголын хөрөнгө оруулалтын дээд хэмжээний уулзалтын үеэр хэлжээ. Уг зөвлөгөөн Лондон хотод хоёр дахь жилдээ болж өнгөрлөө. Монголын хөрөнгийн болон үл хөдлөх хөрөнгийн зах зээл, уул уурхайг дагасан тээвэр, төмөр зам, ложистикийн бизнесийг сонирхсон олон байгууллага зөвлөгөөнд оролцжээ. Монголоос Худалдаа хөгжлийн банк, Улаанбаатар банкнууд оролцож Монголбанкны төлөөлөгч Д.Энхжаргал илтгэл мэдээлэл өгсөн байна. Илтгэлд бодлогын хүүг 2011 онд 3 удаа өсгөж 12.25, заавал байх нөөцийн хувь хэмжээг хоёр удаа нэмэгдүүлэн 11 хувьд хүргэх замаар мөнгөний нийлүүлэлтийн асар хурдацтай өсөлтийг хязгаарлан бууруулах замаар үнийн өсөлтөд нөлөөлж, инфляцийн эсрэг төв банкнаас мөнгөний хатуу бодлогыг үр дүнтэй хэрэгжүүлж байгааг дэлгэрэнгүй танилцуулав. Гадаад валютын захын үйл ажиллагааг гадаад, дотоодын хөрөнгө оруулагч нарт нээлттэй байлгах, гадаад валютын ханшын чөлөөтэй хөрвөх бодлогыг үргэлжлүүлэн, гадаад капитал хөрөнгийн урсгалд аливаа хориг хязгаарлалт тавихгүйгээр ажилуулах нөхцөл бүрдүүлэн ажилуулсны үр дүнд гадаад валютын урсгал тасралтгүй өсч, нөөц 2.7 тэрбум ам долларт хүрсэн. Банкны салбарын тогтвортой байдлыг хангах зорилгоор арилжааны банкны дүрмийн сангийн хэмжээг хоёр дахин нэмэгдүүлж 16 тэрбум, төлбөр түргэн гүйцэтгэх чадварын үзүүлэлтийг 18 хувиар тогтоон улмаар 25 хүртэл, өөрийн хөрөнгийн зохистой харьцааг 10 хувиас 14 болгон өсгөхөөр төлөвлөж байгаа нь дотоодын төдийгүй гадаадын хөрөнгө оруулагчдаас банкны салбарт итгэх итгэлийг нэмэгдүүлэх зорилготой тул гадаадын хөрөнгө оруулагч нар нааштай хүлээн авлаа. Хэдийгээр мөнгөний хатуу бодлого хэрэгжиж байгаа хэдий ч төсвийн тэлэх бодлого нь эдийн засгийн хэт халалтын шинж тэмдэг бий болоод байгаа өнөө үед түүнийг улам гааруулах, үнийн өсөлтийг хөөрөгдөх аюултай байгааг хөрөнгө оруулагч нар онцлон, энэ нь ядуучууд, эмзэг бүлгийхэнд хамгийн хүндээр тусч, улмаар нийгмийн эмзэг бүлгийхэн Засгийн газрын хооронд хүндрэл сөргөлдөөн үүсч болзошгүйг тэд сануулж байлаа.
Б.Болдсүх
