Иргэний танхимд өнөөдөр “Нарны эрчим хүчийг ашиглах нь” сэдвээр чөлөөт хэлэлцүүлэг боллоо. Мэргэжлийн албаны хүмүүс, судлаач, эрдэмтэд оролцсон уг хэлэлцүүлэгт “Нарны эрчим хүчний хэрэглээ Монгол оронд”, “Монгол улсын нарны эрчим хүчээр ажиллах том дулааны станц барьж ашиглах боломж”, “Баруун бүсийн эрчим хүчний системд 100 МВт-ын чадалтай нарны цахилгаан станц байгуулах судалгааны асуудал” зэрэг илтгэл тавьж хэлэлцсэн байна. Мөн “Нарны зайн технологийн хөгжлийн чиг хандлага, шинэ боломжууд” гэсэн илтгэлийн хүрээнд санал солилцжээ. Оролцогчид дараах санал зөвлөмжийг боловсруулж Монгол улсын Ерөнхийлөгчид өгөхөөр болсон юм. Судлаач, албаны хүмүүс ярилцаад салхи болон усан станцыг бодвол нарны эрчим хүч нь хязгааргүй нөөцтэй, байгаль орчинд хамгийн аюулгүй технологи. Салхи нь элсний нүүдэл гаргадаг бол ус нь хязгаарлагдмал нөөц юм. Тиймээс ногоон эдийн засаг ярьж буй өнөө үед нарны эрчим хүч хамгийн тохиромжтой. Цаашилбал сум, аймгийн цахилгаан, дулаан, нийслэлийн агаарын бохирдлыг асуудалд ч нааштай үр нөлөөтэй учир сайн судалгаа хийх хэрэгтэй. Малчдын жижиг хэрэглээний эх үүсвэрийн хүчин чадлыг нэмэгдүүлж, бага дунд оврын нарны цахилгаан станц байгуулах ажилд орох цаг болсон гэдэг дээр санал нэгдэж байлаа.

Б.Ганбилэг