ШӨХТГ-ын дарга О.Магнай дөнгөж сая зарим нэг ноцтой асуудлуудын талаар мэдээлэл хийлээ. Энэ үеэр түүнээс арилжааны банкуудад хийсэн шалгалтын талаар зарим зүйлийг тодрууллаа.

-Арилжааны банкуудад яг хэзээ шалгалт хийв?
Бид зургаан сарын хугацаанд Монгол Улсад үйл ажиллагаа явуулж байгаа 13 банкинд шалгалт хийсэн. Банкууд хураамж, шимтгэл нэрээр иргэдээс хууль бусаар мөнгө аваад байна гэсэн гомдол иргэдээс олон тоогоор ирсэн. Энэ  хүрээнд шалгалт хийж дууслаа. Ер нь зээл олгохдоо арилжааны банкууд шимтгэл гэж авдагийн дээр хураамж гэж давхар авдаг. Энэ бол Өрсөлдөөний хуулийн 12.1.2, 12.1.10, Хэрэглэгчийн эрхийг хамгаалах хуулийн 7.1, 12.9 дахь заалтуудыг тус тус зөрчсөн байна гэж үзэж байна. Тиймээс өнөөдөр арилжааны нэр бүхий 13 банкинд холбогдох албан шаардлагыг хүргүүлж байгаа.

-Яг ямар зөрчил гаргасан учир шаардлага хүргүүлж байгааг дэлгэрэнгүй тайлбарлахгүй юу?
-Зээлийн шимтгэлийн зээл олгосноос гарч буй зардал гэж тайлбарлаж буй боловч зээл олгоход гарах зардалтай харьцуулахад өндөр тогтоосон. Гэрээний харилцаанд оролцогчдын эрх тэгш байдал, зарчмыг зөрчиж байгаа бөгөөд, зээлдэгчийн эрхийг дордуулсан байгаа юм. Зээл олгохтой холбогдуулан гарах зардлаас өндөр хэмжээний татвар авч байгаа нь  Өрсөлдөөний хуулийн 12.1.2 /хууль ёсны ашиг сонирхолд харшлах болон хэрэглэгчийг хууль бусаар хохироож, худалдааны арга хэрэглэхийг хориглоно/ гэсэн хуулийн заалтыг зөрчиж байна. Иймд зөрчил гаргасан арилжааны банкуудад дээр дурдсан зөрчлийг арилгах талаар хугацаатай үүрэг улсын байцаагчийн албан шаардлагын хамт өнөөдөр хүргүүлж байна. Тэгэхээр үүний дараагаас банкууд зээл олгохдоо шимтгэм, хураамж хэлбэрээр дахиж иргэдээс мөнгө авах байдал хаагдах юм. Угаасаа банкууд хүүгээрээ хангалттай орлого олж байгаа.

-Арилжааны банкуудын тайланг харахад томоохон нэр бүхий банкуудын нийт орлогын 70-80 хувийг валютын ханшны  зөрүүн дээрээс олсон гэсэн статистик гарсан байсан. Тэгэхээр нийт орлогынхоо 70-80 хувийг валютын ханшаар олно гэдэг валютын ханшийг урьдчилан мэдэж байсан байх магадгүй. Тэгэхээр эндээс тодорхой хэмжээний хариуцлагыг тухайн банкууд хүлээнэ.