Энэ сарын 8-нд Ерөнхий сайд ШӨХТГ-ын дарга О.Магнайд хариуцлага тооцсон.  Тодруулбал, тэрбээр Ерөнхий сайдынхаа үгэнд орохоо больж, Тэгээд дураараа шийдвэр гаргаж, дуртай үедээ гадаадад зугаалж, шинэчлэлийн Засгийн газрын тэргүүнийг ихэд бухимдуулсан учир Ерөнхий сайд захирамж гаргаж О.Магнайгийн цалинг гурван сар 20 хувиар бууруулахаар болсон гэдэг.
Түүнд сахилгын шийтгэл ногдуулахдаа Засгийн газрын агентлагийн эрх зүйн байдлын тухай хуулийн 15.2-ийг үндэслэн шийтгэжээ. Энэ талаар О.Магнай даргаас тодруулахад “Мэдээж торгуулах юу нь сайхан байхав.  Уг нь бол айхтар юм болоогүй. Гэхдээ манайхыг хариуцдаг сайд Д.Тэрбишдагва. Д.Тэрбишдагва сайд л Ерөнхий сайд руу санал тавьсаар байгаад надад захиргааны шийтгэл оноолгосон. Би дөрөвдэх өдөр Бээжин явчихаад хоёр дахь өдөр ирсэн. Хүний бие  муудаад эргэх хэрэгтэй болсон. Үүнд манай шадар сайд уурласан юм шиг байна лээ. Хувийн ажлаа төрийн мөнгөөр зохицуулсан зүйл байхгүй” гэв.