Хууль зүйн сайд Х.Тэмүүжингийн “нялх амраг” гэж цоллуулаад буй Г.Сарангэрэл ШШГЕГ-ын харьяа цагдан хорих 461 дүгээр ангид  өнгөрсөн гуравдугаар сараас хойш саатуулагдаж байна. Г.Сарангэрэл саатуулагдсан шөнөө 9910....тай дугаар луу олон удаа залгасан байдаг. Залгасан хүнийг олж тогтоохоор УЕПГ-ын зөвшөөрлөөр оператор компаниас нь гаргуулан дүн шинжилгээ хийхэд 9910...тай дугаарын эзэн Хууль зүйн сайд Х.Тэмүүжин болох нь тогтоогдсоныг УМБГ-аас мэдээлсэн. Гэвч ямарваа нэгэн хэрэгт холбогдсон иргэний гэм буруутайг шүүхээр тогтоогоогүй байхад “хар тамхичин, хэн нэгэн албан тушаалтантай холбоотой” гэж олон нийтэд зарлах нь хууль зөрчсөн, хүний эрх, эрх чөлөөнд халдсан үйлдэл боллоо гэж Г.Сарангэрэлийн өмгөөлөгчөөр  ажиллах хүсэлт гаргаад байгаа өмгөөлөгч Б.Батбаяр ярьж байна.
 
Өмгөөлөгч Батбаярын ярьж байгаагаар "Нэгэнт олон нийтийн дунд Г.Сарангэрэлийг “хар тамхичин, Х.Тэмүүжинтэй холбоотой” гэж зарласан нь Г.Сарангэрэл охины хэргийн шийдвэрт нөлөөлөх хар үр дагавартай. Мөн шүүхээр гэм буруутайг нь тогтоогоогүй байхад олон нийтийн хэрэгслээр "Биеэ үнэлэгч, хар тамхичин" зэргээс зарласан нь нийгэмд сөрөг ойлголт төрүүлж, шүүгч нарт ч буруу ойлголт төрүүлсэн. Шүүгч нар дотоод итгэл үнэмшлээрээ  дүгнэдэг учир энэ хүн ял авна гэсэн хардлагыг төрүүлж байна" гэж онцлов.

 Өнгөрсөн гуравдугаар сарын 2-ны 22.00 цагийн үед Сүхбаатар дүүргийн цагдаагийн ажилтнууд хар тамхи хэрэглэж буй охидыг үйлдэл дээр нь саатуулсан. “Миами” зочид буудлын гадна автомашин дотор Метафетамин буюу мөс хэмээх хар тамхи хэрэглэж байсан Г, С, Э, О нарын дөрвөн охиныг саатуулсаны нэг нь Г.Сарангэрэл юм. Г.Сарангэрэлийг өнгөрсөн баасан гаригаас эхлэн цагдан хорих ангид өлсгөлөн зарлаж байгаа гэж сайтуудаар мэдээлсэн ч энэ мэдээллийг ШШГЕГ-аас үгүйсгэлээ.