ХАРИУЦЛАГАГҮЙ ЭМЧ НАРЫН БУРУУГААС... гэж эхэлдэг эмгэнэлт түүхүүдийг та хэр олон сонсож байсан бэ? Магадгүй одоо санахгүй байгаа ч гарын арван хуруунаас тань давсан гэдэгт итгэлтэй байна. Тэр түүх бүрийн ард эрүүл саруул болно гэсэн итгэлээ дэвслүүлж, насан туршдаа “өвчтөн” болсон цаашлаад амь насаа алдагсад байдаг. Цөөхөн хэдэн жишээ. 2009 он. Эх, хүүхдийн эрүүл мэндийн төвийн эмч нар төрөөд дөрвөн сар болж байсан М.Номинжин охинд эмчилгээ хийхдээ хариуцлага алдсанаас тархи нь үхжиж, унаж татдаг дээр нь сонсголгүй, хараагүй болсон.
2011 оны 9 дүгээр сарын 8. Нийслэлийн III Амаржих газарт хагалгаа хийлгэсэн Э.Хонгорзул бүсгүй эмч нарын буруугаас хэвлийдээ бинттэй үлдэж улмаар нарийн гэдсээ тайруулсан.
2013 оны 7 дугаар сарын 27. Клиникийн Нэгдүгээр амаржих газарт 25 настай эмэгтэй саванд нь бохир орсоноос амиа алдсан.
2013 оны 9 дүгээр сарын 26. Сүхбаатар дүүргийн нэгдсэн эмнэлэгт хордлогын оноштой хэвтсэн гурван настай Т.Маралжингоо охин сувилагчдын хариуцлагагүйгээс болж 30 цагийн дараа хорвоог орхисон.
2013 оны аравдугаар сарын 8. Баянхонгор аймгийн Баянхонгор сумын ЕБС-ын хоёрдугаар ангийн сурагч Н.Энхбилэг охинд сургуулийнх нь эмч Н.Цэрэнханд сахуу татрангийн вакцин хийхдээ цусанд нь бохир оруулсанаас гар, хөлийн хуруунууд нь үхжиж, тайруулсан.
2014 оны 5 дугаар сарын 06. Дундговь аймгийн Нэгдсэн эмнэлэгт төрж буй нярайг хүчээр татаж гаргахдаа гарыг нь хугалж, гэмтээсэнээс хоёр хоногийн дараа нас барсан.
Нэг бүрчлэн бичихэд үзэх цаас багадах тул энд хүрээд зогсоё. Хамгийн гол нь хүний эрүүл мэнд амь насаар тоглосон дээрх эмч нарт ямар хариуцлага тооцсон бэ гэдэг нь та бүхэнд сонин байх биз. Харамсалтай нь тэд ажлаас халагдах юм уу цалингийн хувиар торгуулсан байдаг.
Дээрх хэргүүдээс шүүхээр таслагдсан ганцхан хэрэг байгаа нь хагалгааны дараа хэвлийдээ бинттэй үлдэж улмаар нарийн гэдсээ тайруулсан Э.Хонгорзул бүсгүйн хэрэг. Хэдхэн хоногийн өмнө анхан шатны шүүх буруутай эмч нарыг ялласан бөгөөд Ц.Оюунгэрэл, Д.Батзаяа, Д.Ганчимэг нарын эмчлэх эрхийг нэг жилээр хасч, нэг жил, зургаан cap тэнсэн харгалзахаар болжээ.
Тангараг өргөсөн эмч нарт хүлээлгэх хариуцлага ердөө л энэ. Хүний эрүүл мэнд амь нас гэдэг тухайн хүндээ юугаар ч хэмжиж болохгүй үнэт эрдэнэ байдаг. Гэтэл тийм үнэтэй зүйлийг нь салхинд хийсгэсэн хүмүүс ажлаасаа халагдаад л өнгөрч байгаа нь шударга ёсонд хэр нийцэх вэ? Ийм байхад тэднээс хариуцлага нэхэхийн утга учир юу билээ.
Нөгөө талаар “Нийгмийн асуудлыг нь шийдвэрлээд, орчин үеийн дэлхийн стандартад нийцсэн нөхцөлд ажиллуулсан бол манай эмч хэзээ ч алдаа гаргахгүй байсан. Алдаа гаргах нөхцөлд ажиллуулж буйгаараа Монголын төр буруутай” хэмээн нэгэнтээ өгүүлж байсан. Байж болох л хариулт. Гэхдээ өнөөдрийн хувьд нийгмийн асуудлыг нь бүрэн шийдвэрлээд, орчин үеийн, дэлхийн стандартад нийцсэн нөхцөлд ажилтан, албан хаагчдаа ажиллуулж байгаа салбарыг Монголоос олно гэвэл өвсөн дундаас зүү хайхтай адил. Ингэлээ гээд гомдоллож, тунирхсан нь ч цөөхөн. Иймээс цалин, мөнгө, орчин нөхцлөө сайжруулбал бид асуудалгүй хэмээн бусдад буруугаа чихэхийн оронд дотроо бугшсан идээ бээрээ шахаж, эмч хүний өргөсөн тангаргаа эргэн санах цаг болсон.
24tsag.mn
Сэтгэгдэл (5)