Бөх нь хүчтэй, морьд нь хурдан, харваачид нь мэргэн байж монгол түмэн минь хотол олноороо сайхан наадлаа. Иргэд хөдөө агаар салхинд гаран хорхог, хуушуураа идэцгээж уламжлалт баяраа өргөн дэлгэр тэмдэглэцгээв. Энэ жилийн наадам урьд урьдынхаас илүү олон хоног үргэлжилж, амьдрал бараг л зогсохоо шахлаа. Үүнтэй зэрэгцэн дэлхий нийтийг сар гаруй байлдан дагуулсан хөлбөмбөгийн ДАШТ ч өндөрлөв. Баяр ч дуусч, тэмцээн ч өндөрлөсөн учир одоо бүгдээрээ ажлаа хийцгээе.

Хэдийгээр зуны налгар, тайван өдрүүд үргэлжилж буй ч улс төр, нийгмийн амьдралын хамгийн адармаатай цаг үе одоо л эхэлж байна. Ялангуяа, Засгийн газраас хэрэгжүүлж буй Эдийн засгийг эрчимжүүлэх 100 хоногийн хугацаа сар гаруйн дараа дуусна. Уг 100 хоногийн дараа эдийн засгийг тогтворжуулж чадсан уу, валютын ханш буурсан уу гэдгээс эхлээд маш олон ажлыг дүгнэх юм. Тиймээс үлдэж буй богино хугацаанд эрх баригчид өмнөх амлалтаа биелүүлж эдийн засгийг өөдөн татахаас эхлээд маш олон ажлыг хийх хэрэгтэй болоод байна. Өөрөөр хэлбэл, энэ бүхнийг хойш тавьж түр зуур ч болов аргацаах ямар ч боломжгүй гэсэн үг. Өнөөдрийн байдлаар долларын ханш 1830 төгрөг давчихсан байна. Энэ бүхэнтэй зэрэгцэн бараа бүтээгдэхүүний ханш өдрөөс өдөрт өссөөр байна. Цаашид энэ хэвээр өссөөр байвал үндэсний томоохон компаниуд ажлын байрны их цомхотгол явуулна гэдгээ мэдэгдсэн. Ялангуяа барилга болон худалдаа үйлчилгээний компаниуд ажилчдаа цомхотгож ажлаа зогсоох төлөвтэй байгаа аж. Мөн бүх төслийн ажлууд мөнгөгүй зогсчихсон байгаа талаар иргэд ярьж байна. Энэ бол түгшүүрийн маш чанга дохио. Тэр хэрээр чанаргүй зээл ихсэж иргэдийн амьжиргаа доройтож, худалдан авах чадвар буурна. Үүнээс үзвэл эдийн засаг дээрдэх бус улам л хүндэрсээр байна гэдгийг хаа, хаанаа хүлээн зөвшөөрөхөөр болж. Тэгэхээр Засгийн газарт шийдэх асуудал шил, шилээ даран хөвөрсөөр байна гэсэн үг.

УИХ-ын хаврын чуулганы дараа эрх баригч АН сөрөг хүчин болох МАН-тай зөвшилцөх шаардлагатай гэж мэдэгдсэн. Харин МАН зөвшилцөхгүй хэмээн гүрийж байгаа. Харин одоо хоёр нам эдийн засагт тулгамдаад буй асуудлаар илүү сайн ойлголцох шаардлагатай болоод байгаа юм. 

Гэтэл өнөөдөр наадмыг далимдуулан эрхэм гишүүд ийш тийш таран одоцгоожээ. Мөн зарим нь тойрогтоо ажиллаж байгаа нэрээр найр наадам хэсч явна. Энэ жил 100 гаруй сумын тэгш ой тохиож байгаа. Тэгэхээр эрхэм гишүүд маань энд, тэндхийн 90 жилийн ойн баярт оролцоод намрын чуулган хүртэл царайгаа ч харуулахгүй төлөвтэй байна.

Уг нь түүний оронд ажлаа хийцгээж намрын чуулганаас өмнө  намын бүлгүүд шийдэх асуудлуудаа цэгцэлж, ойлголтуудаа нэгмөр болгож баймаар санагдах юм. Тэгэхгүй бол бодлогын томоохон шийдвэр дээр өөр өөрсдийнхөөрөө гэдийгээд, бүр сүүлдээ эрх баригч нам нь хүртэл завсарлага авах гэдэг сонин үзэгдэл давтагдаж мэднэ.

Наадмын дараа намар. Энэ үг намар болсон гэхээс илүүтэй жавар тачигнасан өвлийн бэлтгэлд ханцуй шамлан орохыг сануулдаг. Найр наадмын сарууд шувтарч өвөлтэй золгоход нийслэлчүүд тэр аяараа сая ухаан орсон гэлтэй улиг болсон утааны асуудлаа санадаг нь гэм биш зан болж. Өвлийн хахир хатуу улирлаас өмнө утаанаас эхлээд үр тариагаа хурааж, хадлан тариалангаа бэлтгэх гээд шийдэх олон асуудал байна эрхэм дарга нар минь. Одоо ажилдаа ханцуй шамдан орцгооё.