Цагдаагийн ерөнхий газрын дарга Б.Билэгтийг Засгийн газрын шийдвэрээр уржигдар үүрэгт ажлаас нь чөлөөлсөн. Энэ нь нэг  талаасаа гэнэтийн шийдвэр мэт боловч үнэндээ аль эртнээс яригдаж байсан асуудал юм.

Зарим эх сурвалжийн хэлж буйгаар ЦЕГ-ын даргыг ээлжийн амралттай үед албан тушаалаас нь буулгачихсан юм байна. Энэ нь хуулиндаа ч хориотой зүйл гэдгийг зарим хүмүүс хэлж, бухимдацгааж байгаа юм. Улмаар ЦЕГ-ын дарга Б.Билэгтийн араас  УМБГ-ын дарга хурандаа Ц.Батсүхийг ажлаас нь чөлөөлсөн гэдгийг эх сурвалжууд мэдээлсэн юм. Тодруулбал, ЦЕГ-ын дарга Б.Билэгтийн  оронд  түр орлон гүйцэтгэгчээр томилогдоод буй  С.Баатаржав ажлаа авсан даруйдаа Ц.Батсүхийг чөлөөлсөн гэх зүйл яригдаж байна.

 Тэгвэл Ц.Батсүх хурандаатай холбогдож энэ талаар тодруулахад “Тийм зүйл байхгүй. Би ажлаа хийдгээрээ хийгээд сууж байна” гэх тайлбарыг өгсөн юм.

Юутай ч Б.Билэгтийн араас  хэд хэдэн цагдаагийн өндөр албан тушаалтныг ажлаас нь чөлөөлөх талаар яригдаж эхлээд байгаа нь гадуур янз бүрийн яриа гарах нөхцлийг бүрдүүлээд байгаа юм.
Одоогоор ажлаас нь чөлөөлсөн ЦЕГ-ын дарга Б.Билэгтийн орны хүнээр хэнийг томилох вэ? гэдэг асуудал ид яригдаж байна. Эх сурвалжуудын мэдээлж буйгаар Б.Билэгтийн оронд ЦЕГ-ын даргаар очих магадлалтай гурван хүн байгаа аж. Тодруулбал, Хууль зүйн сайд Х.Тэмүүжингийн зөвлөх О.Алтангэрэл,  Хууль зүйн яамны бодлого зохицуулалтын хэлтсийн дарга хурандаа Н.Амарзаяа, ЦЕГ-ын тэргүүн дэд дарга, хурандаа С.Баатаржав нар юм. Тэдгээрийн  нэг нь ЦЕГ-ын шинэ даргаар томилогдож магадгүй байгаа аж.

Хууль зүйн сайд Х.Тэмүүжин өмнө нь хэвлэлд өгсөн ярилцлагадаа “Хууль зүйн салбарын шинэчлэлийн хувьд цэргийн цолтой ч иргэний статустай хүн ЦЕГ-ыг удирдана” хэмээн ярьж байсан. Х.Тэмүүжин сайдын хэлснээр асуудлыг шийдвэл түүний зөвлөх О.Алтангэрэл ЦЕГ-ын дарга болох магадлал өндөр байна.

Гэхдээ Цагдаагийн салбарын шинэчлэлийг дотроосоо дэмжлэггүйгээр хийх боломжгүй гэсэн байр суурь олны дунд газар авч байгаа. Хэрвээ олон нийтийн энэ зарчмаар асуудлыг шийднэ гэвэл хурандаа Н.Амарзаяа болон С.Баатаржав нарын нэг нь ЦЕГ-аар томилогдох магадлалтай юм.

Хурандаа Н.Амарзаяагийн хувьд нэр хүнд сайтай, өөрийн гэсэн хүрээлэлтэй боловч хөрөнгө оруулгын мэдүүлгээ буруу өгсөн гэх үндэслэлээр Б.Билэгт түүнийг ажлаас нь чөлөөлж байсан. Харин Хууль зүйн сайд Х.Тэмүүжин түүнийг буцааж ЦЕГ-ын тэргүүн дэд даргаар сонгосон боловч үүнийг УИХ-ын дарга З.Энхболд эсэргүүцэж байсан юм. Хэрвээ Н.Амарзаяаг ЦЕГ-ын даргаар сонговол эрх баригчид тэр дундаа УИХ-ын даргаас нилээн эсэргүүцэлтэй тулгарах нь тодорхой болоод байна. Тэгвэл одоо ЦЕГ-ын тэргүүн дэд даргаар томилогдоод буй С.Баатаржавыг энэ албан тушаалд очих хамгийн их боломжтой хүн гэж хүмүүс үзэж байна.