Зам Тээврийн Яамны Төрийн Нарийн Бичгийн Дарга Б.Батзаяаг үүрэгт ажлаас нь чөлөөлөөд удаагүй байгаа. Гэсэн ч тэрбээр өөрийг нь хууль бусаар чөлөөлсөн, улстөрийн тоглолтын золиос болсон гэж ярьж яваа. Мөн өөрийг нь гүтгэсэн хүмүүсийг үхэх ялаар шийтгэнэ ч гэж жиргэж байлаа. Гэвч түүний төрийн нарийн бичгийн дарга байхдаа үйлдсэн хууль бус хэргүүд нь ар араасаа илчлэгдэж эхэлжээ. Түүнийг ажлаас нь чөлөөлсөн гол шалтгаан нь ганц биш гэж хүмүүс ярьдаг. Тодруулбал тэрбээр "Женко" Х.Баттулгыг Зам Тээвэр, Барилга Хот Байгуулалтын сайдаар ажиллаж байх үед "Монголын төмөр зам" компаний Ерөнхий захирлаар ажиллаж байхдаа төсвийн хөрөнгө мөнгийг хайр, найргүй үрж, эрх мэдлээ хэтрүүлэн хэрэглэж байжээ.
    Тухайлбал түүнийг “МТЗ” ТӨХК-ийн Гүйцэтгэх захирлаар урьчилан томилж, 2011 оны 02 дугаар сарын 01-ний өдрийн 30/24 хамтарсан тушаалын 2б заалтаар зөвлөх үйлчилгээ үзүүлэх баг сонгох, “МТЗ” ТУЗ-ын 2011 оны 03 дугаар сарын 01-ний өдрийн 23 дугаар тогтоолоор “McKinsey & Company” Компанийг тендергүй шалгаруулах нөхцлийг түүнд хууль тогтоомж зөрчин бүрдүүлж өгч байжээ. Мөн энэ зорилгоор 2010 оны 12 дугаар сарын 28-ны өдрийн ЗТБХБ-ын Сайдын 427 дугаар тушаалаар “Шинэ төмөр замын төсөл”-ийн ажлын хэсгийн ахлагчаар Ч.Ганбатыг томилж тендерийн баримт бичиг боловруулах, түүний дагуу ажиллах гадаадын зөвлөхийг олох үүрэгтэйгээр, дараа нь 2011 оны 01 дүгээр сарын 24-ний өдрийн тушаалын нэгдүгээр хавсралтаар шалгаруулалтанд хяналт тавих зорилгоор ажлын хэсгийн гишүүн болгосон байдаг төдийгүй 2011 оны 04 дүгээр сарын 07-ны өдөр зөвхөн дээрх оффшор компанитай гэрээ байгуулах шийдвэртэй атал мөнгө хөлсөө бүрэн авахын тулд өөрийн “Либерти партнерс” компанийг гэрээнд оролцогч тал болгож хууль бусаар тендерт захиалагч ба гүйцэтгэгч болсон байна. Энэхүү гэрээнд гарын үсэг зурснаар “ХААН” банкнаас өндөр хүүтэй авсан зээлийг “МТЗ” ТӨХК-ийн дансанд оруулалгүй тэндээс нь 850 мянган ам.доллар шууд бэлнээр авсан баримт бий.

   Энэ мэтээр мөнгө гувчуулсан төдийгүй БНХАУ-ын “China CNP Corporation limited” корпорациас нийт 60 сая ам.доллараар зургаан зүтгүүр худалдан авсан нь ашиглагдах боломжгүй, стандартын шаардлага хангахгүй гэсэн дүгнэлттэйгээр “ДЕПО”-гийн хашаанд “буг” болон зэрэгч байгааг мэдэхгүй хүн үгүй. Уг зүтгүүр нь 60 сая ам. долларын өртөгтэй. Мөн өөрийн эзэн Х.Баттулгын хамт Солонгос, Хятадын хамтарсан групптэй төмөр зам барих нууц гэрээ байгуулсан байдаг ч үүнийгээ эрс үгүйсгэдэг. Гэвч тэр нь хөдлөшгүй үнэн гэдгийг олон хүн гэрчилдэг төдийгүй УИХ-ын гишүүн Ц.Нямдорж хүртэл сануулан хэлж байсан удаатай. Тодруулбал, “Х.Баттулга Солонгос, Хятадын хамтарсан групптэй төмөр зам барих нууц гэрээ байгуулсан байдаг. Уг гэрээнд “Монголын төмөр зам” компаний захирал Б.Батзаяа оролцож гарын үсэг зурсан.Тэдний гар барьсан зургууд интернэтэд тавигдсан нь үүнийг батлана. Х.Баттулга ийм гэрээ байгуулаагүй гэж хэлдэг ч 20 хуудас, англи хэл дээр хийсэн гэрээ бий” гэж зарим эх сурвалж мэдээлдэг юм.