Баянхонгор аймгийн Баян-Өндөр суманд ажиллаж байсан АМГ-ын гурван ажилтан ор сураггүй алга болж нийгмийг нэлээд стресстүүлсэн. Улмаар хоёр геологич эсэн мэнд олдсон ч нэг нь харамсалтайгаар амиа алдсан байдалтай олдсон байдаг.

Тэгвэл эдгээр ажилчид АМГ-ын удирдлагуудын хайхрамжгүй байдлаас болж ийн олон хоногоор уух ус, идэх хоолгүй төөрч, нэг нь харамсалтайгаар амиа алдахад хүрэв үү? гэх асуулт сүүлийн үед олны дунд ихээр  яригдах боллоо.

Учир нь тэд эвдэрсэн машинаа орхиод тусламж эрэхээр, айл хот бараадахаар цааш явахдаа зурвас үлдээснийг нь тэндхийн малчин Гэндэнжамц гэгч олж бүхий л дуулгах газар нь дуулгаж бүр АМГ-ын 9911-тай дугаар эзэмшигч хэн нэг албан тушаалтан руу хүртэл ярьж мэдэгджээ.

Өөрөөр хэлбэл, тэдгээр ажилчдыг алга болсоны маргааш өдөр нь малчин зурвас хийгээд машиныг олоод АМГ, аймгийн цагдаагийн хэлтэс гээд  тэдэнд тусламж үзүүлж чадах бүхий л хүмүүс, алба хаагчдад хэл хүргэсэн гэсэн үг.

Гэвч АМГ-аас яаралтай арга хэмжээг авах бүү хэл өнөөх хэл сураг дуулгасан хүн нь холбогдох хүмүүст мэдээллийг дамжуулахгүй орхисноос тэд  олон хоног хээр орхигдож, ийн нэг нь харамсалтайгаар амиа алджээ.

Харин ажилтан амиа алдсан учир хууль хяналтынхан уг хэрэгт эрүүгийн хэрэг үүсгэн мөрдөн байцаалтын ажиллагааг үргэлжлүүлж байгаа. Мөн энэ хэрэгт буруутай болох зарим хүмүүсээс байцаалт авч эхлээд байгааг ч эх сурвалжууд хэлж байна. Чухам малчны гэрчилж буй 9911-тэй дугаарын эзнийг тогтоож байцаалт авсан эсэх нь одоогоор тодорхойгүй байгаа ч эх сурвалжийн хэлж буйгаар “Уг дугаарын эзэн нь АМГ-ын хэлтсийн дарга Б гэгч” гэдгийг хэлээд байгаа юм.

Хэрэв малчин Гэндэнжамцын хэлснээр АМГ-ын хэн нэг удирдлага ажилчдаа алга болсоныг мэдмэгц яаралтай арга хэмжээг авч, эрлийн багт мэдэгдэж хүмүүсээ хайж эхэлсэн бол 26-хан настай залуу харангадаж амиа алдсан байдалтайгаар 9 хоногийн дараа олдохгүй байх байсан нь лавтай.

Тиймээс ажил үүрэгтээ хайнга хандаж, хүний алтан амийг юман чинээ санаагүй тэр албан хаагчийг заавал илрүүлж, тодорхой хариуцлагыг үүрүүлэх нь зүй ёсны хэрэг гэдгийг иргэд хэлээд байгаа юм.

Түүнчлэн, хөдөө орон нутагт томилж буй алба хаагчдынхаа бүх шаардлагатай зүйлсийг байгууллагаас нь гаргаж өгч, хөдөлмөр аюулгүй байдлыг нь сайтар хангуулах учиртай.

Гэвч тухайн геологичдын сууж явсан машины дугуй хагарахад “дугуй нөхөх нөхөөс, олгой хаймар, нассос” гээд дугуй нөхчихмөөр нэг ч зүйл байгаагүй гэдгийг эсэн мэнд олдсон Эрдэс баялгийн судалгааны дарга А.Дэлгэрсайхан гэрчилжээ. Мөн тухайн машин эвдэрсэн тохиолдолд жолооч хариуцлага үүрч, өчнөөн өрөнд ордог учир  жолооч Т.Түмэнбаяр хагарсан дугуйтай явахгүй. Машин эдвэрчихвэл над дээр бүх хариуцлага ирнэ гээд явганаар явсан байдаг.

Энэ мэт АМГ-ын удирдлагууд хөдөө орон нутагт томилогдож буй ажилчдадаа тавих хараа хяналт муу, аюулгүй байдалд анхаараагүйгээс эд хийж бүтээх насан дээрээ яваа залуухан геологич харамсалтайгаар амиа алдлаа.

Харин хамгийн анх хэл дуулгасан 9911-тэй дугаарын эзний талаарх мэдээллийг АМГ-ын дарга, удирдлагууд ихэд нууцалж байгааг хэвлэл мэдээллийнхэн цухас дурджээ.