ОХУ-ын Ерөнхийлөгч Владимир Путин энэ лхагва гарагт манай улсад айлчилна. Сириэс эхлээд Украйн хүртэлх олон улсын маргаант асуудлуудын төвд байдаг хүчирхэг удирдагчийн тухай сонирхолтой 24 баримтыг 24tsag.mn дэлгэж байна.1. 62 настай Владимир Путин дэлхийн хамгийн хүчирхэг хүн. “Форбс” сэтгүүл 2013 онд ингэж зарласан шалтгаан нь тэрээр 1999 оноос хойш ОХУ-ын төрийн жолоог залж яваа бөгөөд цөмийн цэнэгт хошуутай армийг удирддаг, НҮБ-ын Аюулгүйн зөвлөлийн гишүүн, дэлхийн хамгийн том газрын тосны компанийн ихэнхийг эзэмшигч мөн 2024 он хүртэл их гүрний тэргүүн байх боломжтой нэгэн аж.
2. В.Путин спортын мастер. Тэрээр сурагч байхаасаа бокс, самбо, жудо бөхөөр хичээллэсэн бөгөөд одоо ч самбо, жудог орхиогүй байна. Оюутан байхдаа самбо, жудо бөхийн спортын мастер зэрэгтэй болж, их сургуулиа төгссөний дараа жил Ленинградын жудо бөхийн аварга болж байсан. 18 насандаа жудогийн хар бүстэй болжээ. ОХУ-д одоо зохион байгуулагдаж байгаа Жудогийн дэлхийн аваргын логог түүний зургаар хийсэн нь ихээхэн дуулиан тариад байна.
3. 1999 онд Васили Шестаков, Алексей Лавитспи нартай хамртан “Владимир Путинтай хамт жудогоор хичээллэе” нэртэй анхны номоо бичиж байв.
4. Тэрээр Ленинград хотод нийтийн байранд өссөн бөгөөд орцондоо харх агнаж тоглодог байснаа дурсан ярьдаг.
5. Тагнуулч болох багын мөрөөдлөө 23 настайдаа биелүүлжээ. 1975 онд их сургуулиа төсгөөд Улсыг аюулаас хамгаалах хороо буюу КГБ-д тагнуулчаар ажиллаж эхэлсэн.
6. Хойд хөршийн тэргүүн зэвсэг техникийг гарамгай ашигладаг. КГБ-ын сөрөг тагнуулч Путин сөнөөгч онгоц, танк зэрэг бүхий л зэвсгийг ашиглаж, шаардлагатай тохиолдолд дээд зэрэглэлийн хорлон сүйтгэх ажиллагааг өндөр ур чадвартай гүйцэтгэх эрдэмд суралцжээ.
7. Түүнийг найз нөхөд нь маш азтай хүн гэдэг. В.Путин сугалаанаас хожсон хамгийн том шагнал болох цоо шинэ запорожец машинаараа төгсөх курстээ гангарч байв.
8. В.Путин амьтанд их хайртай. Чөлөөт цагаа онгон байгальд амьтдын дунд өнгөрүүлдэг. Гэртээ багахан хэмжээний зоо парктай тэрээр хар лабарадор Кони, хоёр пудль болон каракачан үүлдрийн Баффи нэрт дөрвөн нохой тэжээдэг. Мөн ямаа, ишиг, янзага, морь бас амур барын зулзага тэжээдэг. Хайртай нохдоосоо чухал хуралд авчирч байсан нь цөөнгүй.
9. Путин герман хэлийг унаган хэл шигээ эзэмшсэн. Англи хэлийг ч мөн өндөр түвшинд судалсан ч англиар ярих дургүй. 2013 онд Оросын тэргүүн “World expo 2020”-ыг зохион байгуулах эрх авах хуралдаанд анх удаа англиар илтгэл тавьсан нь тун сонирхолтой байлаа.
10. Харин англиар дуулах дуртай. 2010 онд Петербург хотноо болсон хандивын үйл ажиллагаанд “Blueberry Hill” дууг жааз оркестртой дуулж байсан юм.
11. 30 жил ханилсан эхнэр Людмилагаас өнгөрсөн онд салсан. “Эсмеральда” балетын завсарлагаар телевизийн сэтгүүлч В.Путинээс ярилцлага авахад тэрээр эхнэртэйгээ зэрэгцэн зогсож байгаад салахаар шийдсэнээ мэдэгдсэн нь олон улсын хамгийн шуугиант мэдээлэл болсон.
12. Их гүрний удирдагчийн толгойд салах бодол төрүүлсэн хүнийг олимпийн аварга, 31 настай уран гимнастикч Алина
Кабаева хэмээн үздэг. В.Путиныг охид шигээ залуухан бүсгүйтэй холбогдсон тухай 2007 оноос шуугиж эхэлсэн юм. 2009 онд Америкийн “The New York Post” баттай эх сурвалжаас авсан мэдээлэл хэмээн онцолж “Кабаева Путины хүүхдийг гаргалаа” хэмээн мэдээлсэн бол 2013 оны нэгдүгээр сард “Кабаева Путинд охин төрүүлж өглөө” хэмээх материал нийтэлжээ. Харин Путин мэдээллийг эсэргүүцсэн ч сониныг шүүхэд өгөөгүй. 13. Тэрээр өмнөх эхнэрээсээ Маша, Катя гэх хоёр охинтой. 28, 27 настай охидынх нь багын зургаас өөр зураг Оросын хэвлэлүүдэд хэзээ ч гарч байгаагүй. Тэр бүү хэл Кремлиний эрхмүүд ч тэдний төрхийг мэддэггүй байна. Эцэг нь тэдний тухай ямар ч асуултад хариулт өгөхөөс татгалздаг бөгөөд мэдээллийг нь маш их нууцалдаг.
14. Ерөнхийлөгч өнгөрсөн жилд 187 мянган ам.долларын цалин авчээ.
15. Түүний нийт хөрөнгийг 70 тэрбум ам.доллар гэж үздэг. Тэрээр “Газпром” компанийн 4.5 хувь, “Гунвор” группын 50 хувь, “Сургутнефтегаз”-ын 37 хувийг эзэмшдэг. Мөн 20 тансаг зэрэглэлийн хаус, 15 нисдэг тэрэг, 43 онгоц, 53 метрийн урттай усан онгоц эзэмшдэг гэж барууны хэвлэлүүд онцолжээ.
16. В.Путиныг маш өндөр боловсролтой удирдагчид тооцдог. Ленинградын их сургуулийн хуулийн ангийг дүүргэсэн бөгөөд эдийн засгийн ухааны профессор юм. 1990 оноос хойш өнөөдрийг хүртэл төгссөн сургуулийнхаа зөвлөх захирлын үүргийг гүйцэтгэж байгаа.
17. Үгүйсгэгчид В.Путиныг оюуны өмчийн хулгайн хэрэгтэнд тооцдог. Тэрээр 1997 онд “Зах зээлийн харилцааны төлөвшлийн үеийн бүс нутгийн стратеги төлөвлөгөө” сэдвээр эдийн засгийн докторын зэргээ хамгаалжээ. 2006 онд энэхүү диссертацийн 16 хуудас нь 1978 онд бичигдсэн “Стратеги төлөвлөгөө ба бодлого” хэмээх бүтээлээс авсан гэж мэдээлж байсан юм.
18. В.Путины хобби их сонирхолтой. Тэрээр олон жилийн турш газрын зураг болон алдартай хүмүүсийн хөрөг бүхий марк цуглуулж байна.
19. В.Путин цагаа зөвхөн баруун гартаа л зүүдэг. Ихэвчлэн Blancpain, A.Lange & Sohne, Breguet, Patek Philippe зэрэг тансаг зэрэглэлийн цагийг зүүдэг.
20. Түүний тухай 12 баримтат кино хийгджээ. “Үл мэдэгдэх Путин”, “Нөхөр Ерөнхийлөгч”, “Путины систем”, “55”, “Хана”, “Путин, Орос, Баруун”, “Ёроолгүй гүний гүүр”, “Владимир Путины арьс”, “Энэ бол Путин”, “Путины үнсэлт, “Би Путин”, “Цаасан дээрх титэм” зэрэг баримтат кинонууд бүтээгдсэн бол “Хэвлэлд зориулаагүй” хэмээх нэртэй УСК хийгджээ. 21. Тэрээр өдөр бүр усанд сэлж, хүйтэн устай ваннд суудаг. Өглөөний цайны дараа усанд сэлж, спорт танхимд дасгал хийгээд хүйтэн устай ваннд ордог нь түүний эрүүл чийрэг байдгийн нууц ч байж мэдэх юм.
22. Ерөнхийлөгч хилийн чанадад явахдаа заавал орос тогооч, үйлчлэгч, зөөгч зэргийг дагуулдаг. Зочид буудалд буухад өрөөнийх нь бүх ор дэрний болон ариун цэврийн хэрэгслийг Кремлинээс шалгаж ариутгасан лацтай зүйлсээр сольдог байна.
23. Сталинаас хойш хамгийн их ачаалалтай ажиллаж байгаа удирдагч гэж өөрийгөө тодорхойлсон удаатай.
Д.Идэр
www.24tsag.mn
www.24tsag.mn
Сэтгэгдэл (21)