Узбекийн Ташкент хотод болсон чөлөөт бөхийн ДАШТ-ээс 19 настай охин алтын медаль авч монголчуудыг баярлууллаа. С.Цэрэнчимэд гэдэг шинэ дэлхийн аваргатайгаа танилцацгаая. Түүний намтар амжилтаар дүүрэн юм.

1. С.Цэрэнчимэд 1995 онд төрсөн, 19 настай.
2. Хэнтий аймгийн Цэнхэрмандал суманд төрсөн.
3. 2013 онд нийслэлийн Баянзүрх дүүргийн 79 дугаар бүрэн дунд сургууль төгссөн,
4. Япон улсын Окиямагийн их сургуульд суралцаж байсан.
5. Түүнийг спортод хөтөлж авчирсан хүн нь Дамбарагчаа дасгалжуулагч.
6. 2007 оноос чөлөөт бөхийн спортоор хичээллэж “Алдар” спорт хороонд дасгалжуулагч Ц.Хосбаярын удирдлага дор бэлтгэл сургуулилтаа хийж байна.
7. Чөлөөт бөхийн Үндэсний шигшээ багт 2013 онд тамирчнаар орсон.
8. Тэрбээр 60 кг-ийн жинд барилддаг.
9. 2011 онд спортын мастер, мөн 2013 онд олон улсын хэмжээний мастер цол авсан.
10. Хүүхдийн спортын наадмаас алт, өсвөр үеийн УАШТ-нээс хүрэл, хошой алт, залуучуудын улсын хошой алт хүртсэн гээд түүний гараа амжилтаар дүүрэн юм.
11. С.Цэрэнчимэд Бүх ард түмний спортын наадмаас мөнгө, УАШТ-нээс мөнгө, хошой алтан медаль хүртсэн.
13. Тэрбээр өнгөрсөн жил УАШТ-нд 59 кг-ийн жинд түрүүлж, дуулиан тарьж байлаа. Учир нь тэрбээр 18 настайдаа дэлхийн аваргын хүрэл медальт ОУХМ Т.Мөнхтуяатай хүч үзэж, ялснаар алтан медалийн эзэн болж, өөрийгөө ямархуу өсөх ирээдүйтэй тамирчин болохоо харуулсан юм.
14. “Mongolia Open” олон улсын тэмцээнээс 2013 онд алт, 2012 онд Энэтхэг улсын Нью-Дели хотод болсон анхдугаар Хари Рамын “Гранд-При” олон улсын тэмцээнээс хүрэл медальтай.
15. 2014 онд ОХУ-ын Красноярск хотод болдог И.Ярыгиний нэрэмжит “Алтан Гран-При” олон улсын тэмцээнээс мөнгө,
16. Мөн Польш улсад болдог “Poland Open” олон улсын тэмцээнээс алтан медаль хүртжээ.
17. Энэ жилийн ДАШТ-нд 2014 онд  тэрбээр нэгдүгээр тойрогт оросын бөх, ДАШТ-ний 4 хүрэл, мөнгөн медальт, европийн 5 удаагийн аварга Наталья Гольцтой таарч 4:0, 3:0 онооны харьцаагаар ялсан.
18. Харин хоёрдугаар тойрогт японы бөх Казуки Сакамийг цэвэр хожиж мөнгөн медалийн төлөө финландын бөх Маарит Нейра Оллитой өрсөлдөж цэвэр ялсан билээ.
19. Харин алтан медалийн төлөө азербайжаны бөх, олимпийн наадмын мөнгө болон ДАШТ-ний мөнгө, хошой хүрэл медальт Юлия Раткевичтай барилдаж 2:3, 11:0 онооны харьцаагаар ялж, аварга болсон.
20.Аварга болоод амьсгаагаа дарж чадаагүй байхдаа сурвалжлагчийн асуултад хариулахдаа “Монголын бөхчүүд багаараа сайн бэлтгэлтэй ирсэн, бид нэг баг болон ажиллаж үр дүнг нь амсаж байна. Манай холбооны ерөнхийлөгч Асашюрод эмэгтэй бөхчүүдийн тусгай хөтөлбөр гарган ажиллаж байгаад нь баяр хүргэж байна. Тэр хөтөлбөрийн үр дүнд бидний барилдаан сайжирч байна” гэж хэлжээ.
21. Түүний аваргы болохыг гэр бүлийнхэн нь зурагтаар харж баярласан бол шинэ аварга С.Цэрэнчимэд ээжтэйгээ яриад "Би та нартаа хайртай шүү" гээд хоолой нь зангирч байсан гэнэ.
22. Тэрбээр хамгийн залуудаа Дэлхийн аварга болсон тамирчин болж байна. З.Ойдов 25 настайдаа, Х.Баянмөнх 31 настайдаа, С.Батцэцэг 20 настайдаа дэлхийн аварага цол хүртэж байсан бол С.Цэрэнчимэд 19 настайдаа тэрхүү эрхэм цолыг авч бас нэг өвөрмөц дээд амжилт тогтоолоо.
23. С.Цэрэнчимэд ээж, ахын хамт амьдардаг.
24. Залуу аварга болсон түүнээс монголчууд улам их амжилтыг хүсч байна.