МАН-ын удирдах зөвлөлийн хурлаар Н.Алтанхуягийн оронд М.Энхболдыг тэргүүн шадар сайр болгож,
түүний буйранд тус намын нарийн бичгийн дарга Я.Содбаатарыг томилно хэмээсэн нь
хүчтэй эсэргүүцэлтэй нүүр тулаад байна. Түүний оронд одоо МАН-ын УИХ дахь бүлгийн дарга
байгаа Ө.Энхтүвшинг хамаагүй илүү ажиллах хүн хэмээн үнэлж байгаа аж. Хамтарсан Засгийн газар нурсан тул МАН-ынхан
хүчээ хэнээр, хэрхэн сэлбэх вэ гэсэн хэцүүхэн асуулттай тулгараад байна. Бүгд л
зөөлөн суудалд сууж, эрх мэдлийн үзүүрээс атгах хүсэлтэй болохоор сайд болох
гэсэн тэмцэл МАН-ын дотоод зөрчлийг улам хурцалж байх шиг. Яамдын сайд нарыг
яаж ийгээд томилох нь тодорхой. Харин АН-тай хамтарсан Засгийн газар
байгуулахдаа шинээр зохиосон, яг юу хийж, ямар үүрэг хүлээдэг нь бүрхэг байдаг
шадар сайд, тэргүүн шадар сайдын албан тушаал байх ёстой эсэх нь бас л маргаан
дагуулж байна. Өмнө нь АН-ын дарга Н.Алтанхуяг бялуу хүртэхдээ тэргүүн шадар
сайдын суудалд тухалсан. Харин МАН-аас М.Энхболд шадар сайдаар томилогдсон.
Тэгвэл АН хүмүүсээ татсанаар шадаруудын сууж буй сандал ч бас чичирхийлж эхлэв.
МАН-ын удирдах зөвлөлийн хурлаар Н.Алтанхуягийн оронд М.Энхболдыг суулгаад,
түүний буйранд тус намын нарийн бичгийн дарга Я.Содбаатарыг томилно хэмээсэн нь
хүчтэй эсэргүүцэлтэй нүүр тулаад байна. Түүнийг нас залуу, дээр нь сонгуульд
нэр дэвшээд уначихдаг “хийморгүй” эр тул шадар сайд болгохгүй гэж УИХ дахь
МАН-ын гишүүд дургүйцжээ. Түүний оронд одоо МАН-ын УИХ дахь бүлгийн дарга
байгаа Ө.Энхтүвшинг хамаагүй илүү ажиллах хүн хэмээн үнэлж байгаа аж. Харин
Я.Содбаатарыг залуучууд нь сайшаан дэмжиж байгаа бололтой.
Я.Содбаатар нь МАН-ын нарийн бичгийн дарга
болохоосоо өмнө МХЕГ-ын дарга байсан. Түүнээс өмнө МАСЗХ-ны нарийн бичгийн
даргын үүрэгтэй байсан. Мөн Үйлдвэрлэл худалдааны яам гэж байхад дэд сайдаар
ажиллаж байсан юм. Тэрбээр урьд нь УИХ-ын сонгуульд дунд сургуулиа төгссөн Өвөрхангай
аймагт нэр дэвшээд амаараа шороо үмхсэн. Олон санал авч, олигтойхон танигдаж
чадаагүй. Тийм хүнийг шадар сайд болгоно гэдэг МАН-ын хувьд эрсдэлтэй бас,
ичгүүртэй хэрэг гэж УИХ-ын гишүүд нь үзэж байгаа тул ийнхүү эсэргүүцэж байна. Хэрэв
түүнийг сөрөн зүтгүүлсээр байж шадар сайд болговол нэгд, МАН чадварлаг боловсон
хүчнээр дутагдаж байгаагийн илрэл болох юм. Хоёрт, МАН-ын өрх доторхи зөрчлийг
хурцатгаж, магадгүй цаашлаад задралыг ч эхлүүлж болзошгүй гэж нам дотроо ярьж
байна. Тэгээд ч Засгийн газарт сөрөг хүчин байхгүй болчихоод байхад заавал хоёр
шадар сайдтай байх хэрэггүй гэсэн шүүмжлэл хүчтэй өрнөсөөр байна.
Б.Баяр
