Өнгөрөгч амралтын өдөр Бөхийн өргөөнд Ловон Бадамжунай бурхны ван хүртээх ёслол болж өнгөрлөө. Хурлыг “Тарвилан” хийд болон буддын шашны улааны урсгалаар үйл ажиллагаа явуулдаг хийдүүд хамтран зохион байгуулсан юм. Энэхүү ёслолд урилгаар Балба Улсын “Жаран гашур” хийдийн Гүррү Рэнбүүчи Буфати Бизра хамба лам өөрийн хийдийн лам нартай хүрэлцэн ирж бурхны айлдвар буулгасан юм. Мөн манай улсын Нинмава буюу улааны чиглэлээр номлодог 80 гаруй лам хурсан олонд Бадамжунай бурхны ач тус, зүрхэн тарнийг зааж сургасан юм. Бадамжунай бурхны ван хүртээх ёслолд ХХААХҮ-ийн сайд Т.Бадамжунай, УИХ-ын гишүүн Д.Оюунхорол нарын төрийн түшээд хүрэлцэн ирсэн. Ван хүртээх гэдэг нь “Эрх авна” гэсэн утгатай үг аж. Бадамжунай бурхны номлол нь сэтгэлээ номхотгох, гэгээрэлд хүрэхэд оршдог байна. Хурлын дараа “Жаран гашур” хийдийн хамба Буфати Бизра сүсэгтэн олонд Бадамжунай бурхныг аравнайлан адислаж тараасан юм.

Т.Энхэлээ