МҮЭХ-оос энэ сарын 20-нд буюу баасан гаригийн 12 цагт нийтийг хамарсан томоохон хэмжээний эсэргүүцлийн жагсаал цуглаан хийнэ гэдгээ албан ёсоор мэдэгдлээ. Тэд жагсаал цуглаан хийх болсон шалтгаанаа ингэж тайлбарлаж байна. МҮЭХ-нь нефть болон бусад өргөн хэрэглээний барааны үнийн өсөлттэй холбоотой асуудлаар гурван талт хэлэлцээр хийх хүсэлтийг Засгийн газарт тавьсан ч тэд ямар нэгэн хариуг ирүүлээгүй байна. Засгийн газрын гишүүд ард түмэнтэйгээ хэлэлцээрийн ширээнд сууж үүссэн хүнд нөхцөл байдлаас гарах талаараа ярих ёстой байтал таг чиг алга болж буй нь биднийг ийм шийдвэр гаргахад хүргэлээ гэж МҮЭХ-ын ерөнхийлөгч С.Ганбаатар хэлж байна. Ирэх баасан гаригт гурван талт хэлэлцээр хийхийг шаардсан бичгийг засгийн газарт өгөх юм байна. Шаардах бичгийг засгийн газрын гишүүд бүрэн бүрэлдэхүүнээр гарч ирж авах ёстойг тэрээр мөн санууллаа. Тэмцэл үр дүнд хүрэхгүй бол нэгээс хоёр бензиний компаниудаас өөр газраас бензин авахуулахгүй байх арга хэмжээг зохион байгуулна гэнэ.  Шудрага бус өрсөлдөөнийг хянан зохицуулах газар, Монгол банк, УИХ, Засгийн газар долларын ханшийг бууруулж, хүмүүсийн цалин орлогын худалдан авах чадварыг буцааж хэвэнд нь оруулах болтол тэмцэлээ үргэлжлүүлэх аж. МҮЭХ-оос ард иргэдэд өөрсдийг нь дэмжихийг уриалсан наалт бүхий тэмдэгийг тарааж эхлээд байгаа юм байна.

Т.Хулан