Оюутолгой төслийг өөрийн болгохын тулд уул уурхайн магнатууд ширүүн өрсөлдөхөөр рингэн дээр гарч ирээд байна. Энэ ордын 66 хувийг илт давуу эзэмшдэг “Айвенхоу Майнз”, түүний 49 хувийг эзэмшихээр болсон “Рио Тинто” компаниуд аль аль нь Оюутолгойг өөрийн болгохоор тэмцэж эхэлсэн нь улам хурцадмал болж байна. Оны өмнө буюу 12-р сарын 12-нд Австралийн хуулийн дагуу “Рио Тинто”-гийн зүгээс “Айвенхоу Майнз” компанид эзэмших хувиа цаашид нэмэгдүүлэх хууль ёсны эрх нь баталгаажсан юм. “Айвенхоу Майнз”-ын гүйцэтгэх захирал Р.Фрийдланд энэ эрхийг нь цуцлуулах гэж янз бүрээр оролдсон ч бүтээгүй билээ.
  Тэдний анх байгуулсан таван жилийн гэрээгээр “Рио Тинто” эзэмших хувиа 49-өөс дээш нэмэхгүй гэсэн заалттай байсан бөгөөд гэрээний хугацаа нь энэ сарын 28-нд дуусна.
Ингэснээр “Рио Тинто” нь “Айвенхоу Майнз”-ын хязгааргүй тооны хувьцааг дээд тал нь таван хувьцаа эзэмшигчээс хөнгөлөлттэй үнээр авах эрх нээгдэх аж. Өөрийн эзэмшдэг 49 хувийг 50-аас дээш болгож хяналтыг гартаа авахыг туйлын их хүсч байгаа “Рио Тинто”-гийн хувьд энэ нь алдаж болохгүй боломж, “аманд орсон шар тос” юм. Харин Монголын Засгийн газартай “дайн” өрнүүлж байж Оюутолгойн гэрээг хэрэгжүүлэх болсон Р.Фрийдландын хувьд уй гашуу юм.
  “Рио Тинто”-гийн цаашид хийх алхам тун энгийн бас амархан. Оюутолгойн төсөл сунжрах тусам “Айвенхоу Майнз”-ын хувьцаа унасаар байх бөгөөд дээр дурдсан давуу эрхээ ашиглан хувьцааг хөнгөлөлттэй үнээр амархан худалдаж авах юм. “Ройтерс” агентлагийн мэдээлснээр одоогоор Оюутолгой болон “Айвенхоу Майнз”-ын хувьцааг авахаар “Рио”-той өрсөлдөх компани рингэн дээр харагдахгүй байгаа аж. Лондоны бирж дээр арилжаанд оролцдог “Brewin Dolphin” брокерийн пүүсийн шинжээч Ник Станоевич “Рио Тинто хамгийн ашигтай төслийг өөрийн болгохын тулд хяналтын эрхийг гартаа авахыг хүсч байна. Аль аль нь ялахын тулд нарийн арга зам хайж байгаа” гэжээ. Магадгүй зөвхөн Оюутолгойг авахын тулд “Айвенхоу”-гийн охин компани “South Gobi resources” болон  “Kyzyl Gold” төслөөр наймаалцаж магадгүй аж. Харин ацан шалаанд орсон Р.Фрийдланд ирэх тавдугаар сарын 11-нд болох хувьцаа эзэмшигчдийн хурлыг хүлээх үлдэж байна. Ирээдүйн их мөнгөний үзүүрээс атгаад алдах эсэх нь хурлаас өмнө бага хэмжээний хувьцаа эзэмшигчдийг “найрч” чадахаас нь шалтгаална. Гэсэн ч Фрийдландад 66 хувь нь 13.3 тэрбум доллараар үнэлэгдээд байгаа Оюутолгойг авч үлдэх тун бага “шанс” үлдээд байна.